10 հազար դրամի գողության համար 6,5 տարի ազատազրկված կնոջ վրա կալանավայրում ծախսելու են 14 մլն դրամ. Իրավապաշտպան

Ասում են՝ գողը պետք է նստի, բայց եկեք սկզբից մեծ գողերից սկսենք: Այս մասին, այսօր՝ ապրիլի 3-ին, լրագրողների հետ հանդիպման ժամանակ նշեց «Վելես» իրավապաշտպան կազմակերպության նախագահ Մարինա Պողոսյանը՝ անդրադառնալով Սյունիքի մարզում իր ծանոթից 10 հազար դրամ գողացած կնոջը 6,5 տարով ազատզրկելու դատարանի որոշմանը:

«Թող իրենք իրենց թալանածի համար նստեն, հետո մենք Հասմիկ Սարգսյանի ձեռքը բռնած կգնանք: Մարդիկ ասում են՝ սա առաջին դեպքը չի: Այո, առաջին դեպքը չի, և վերջինն էլ չի լինելու այնքան ժամանակ, քանի դեռ պետությունը իր համար զինվոր ծնած մորը աշխատանքով չի ապահովում:

Ասենք, Հասմիկ Սարգսյանին դատապարտեցին և նա պետք է 6,5 տարի գտնվի կալանավայրում: Մեկ օրը կալանավայրում անցկացնելն արժի 6 318 դրամ: 6,5 տարվա կտրվածքով դա 14 մլն դրամից ավելի է անում: Մենք հարկատուներս, այդ գումարը պետք է տանք, որ Հասմիկ Սարգսյանը գնա ուղղվի՞: Մենք ունե՞նք այդպիսի կալանավայրեր, որտեղ ուղղվում են»,-ընդգծեց իրավապաշտպանը՝ հավելելով, որ իրականում 4 հազար դրամ է գողացել, ու եթե նույնիսկ 10 հազար դրամ գողացած լիներ, տուժողն ասել է, որ ներել է՝ տեսնելով, թե ին վիճակում է ապրում Հասմիկ Սարգսյանը:

Անդրադառնալով Հասմիկ Սարգսյանի հայտարարությանը, թե քննիչը քանոնը դրել է իր կոկորդին ու ստիպել, որ խոստովանի, նա նկատեց, որ դա հաղորդում է հանցագործության մասին:

«Այսպես շարունակվելու դեպքում՝ գողությունները շատանալու են: Հասմիկին ասում են՝ գնա 6,5 տարի նստի, քո վրա պետությունը գումար ծախսի, երեխաներին տանեն մանկատուն, մանկատներն էլ գումար ծախսեն, սա ինքնանպատա՞կ է: Մեր երկրում փոքր գողություն անողներին են դատում: Սմետան գողացող զինվորին եք դատում: Դուք սկի մի զինվոր չեք կարողանում կուշտ պահել, որ նա գնում սմետան է գողանում: Էս չի՞ ձեր պահած երկիրը: Լավ է անում գողանում է, բա պետք է թողնի երեխաները սոված մնա՞ն: Երեխաները սովից մեռնեն, որ լիքը լպիրշ սրիկաներ 30-40 հազարանոց կոնյակ խմեն 200 հազար դրամանոց գավաթներով, արծաթից ու ոսկուց ժամացույցներ գնեն, 17 մլն դրամի ծաղիկ պատվիրե՞ն իրենց չգիտեմ ինչերի համար»,-նշեց Մարինա Պողոսյանը:

Նշենք, որ Հասմիկ պողոսյանը գողությունը կատարելիս խնամքին ունեցել է 3 անչափահաս երեխա, որդին էլ ծառայում է բանակում: