Ֆրանկոֆոնիայի միջազգային օրվան նվիրված միջոցառում Բուենոս Այրեսում

Մարտի 20-ին Արգենտինայի արտգործնախարարության Սան Մարտին պալատի Լիբերտադոր սրահում` ԱԳ նախարար Խորխե Ֆորիի նախագահությամբ տեղի ունեցավ Ֆրանկոֆոնիայի միջազգային օրվա առթիվ կազմակերպված միջոցառում, որի համանախագահներն էին Արգենտինայում ՀՀ դեսպան Էսթերա Մկրտումյանը և Ֆրանսիայի դեսպան Պիեր Անրի Գինյարը:

Միջոցառումը մեկնարկեց Արգենտինայի ԱԳ նախարարի ողջույնի խոսքով, այնուհետև ելույթներով հանդես եկան Հայաստանի և Ֆրանսիայի դեսպանները: Խորխե Ֆորին իր ելույթում մասնավորապես նշեց, որ 2016թ. դառնալով Ֆրանկոֆոնիայի միջազգային կազմակերպության դիտորդ անդամ` Արգենտինան ի դեմս նախագահ Մաուրիսիո Մակրիի կառավարության, ցանկանում է ընդլայնել ֆրանկոֆոն պետությունների հետ իր քաղաքական, տնտեսական և մշակութային կապերը: ԱԳ նախարարը կարևորեց նաև Արգենտինայի վրա մեծ ազդեցություն թողած ֆրանսիական մշակույթի և ժողովրդավարական մտածելակերպի դերը՝ շեշտելով, որ դրանք ոչ միայն խթան են հանդիսացել Արգենտինայի անկախության պայքարի համար, այլ նաև կազմել են Արգենտինայի մշակութային կյանքի և աշխարհի հետ հարաբերակցվելու հենքը:

Արգենտինայում ՀՀ դեպան Էսթերա Մկրտումյանն, իր ելույթում ներկայացնելով հայ-ֆրանսիական բարեկամության պատմությունը, մասնավորապես ասաց. «Հայ և ֆրանսիացի ժողովուրդների բարեկամությունը հազարամյա պամություն ունի: Այս առումով առանցքային է 12-14-րդ դարի Կիլիկյան թագավորության ժամանակաշրջանը, երբ առավելապես սերտացան հայ-ֆրանսիական կապերը: Առանձնահատուկ է 19-րդ դարում հայկական մշակութային զարթոնքի վրա ֆրանսիական մշակույթի ազդեցությունը։ Ֆրանսիացի մեծ լուսավորիչների գաղափարները խոր հետք են թողել հայկական մտքի և աշխարհայացքի զարգացման վրա, հատկապես մշակութային նոր հոսանքների, ազատության ու մարդասիրության գաղափարների տարածման առումով»։

Այնուհետև ՀՀ դեսպանը ներկայացրեց ս.թ. հոկտեմբերին Երևանում կայանալիք Ֆրանկոֆոնիայի միջազգային կազմակերպության 17-րդ գագաթաժողովի Հայաստանի նախագահության առաջնահերթությունները, օրակարգի թեմաները, Ապրել միասին կարգախոսի էությունը, անցկացվելիք կարևոր միջոցառումները` հատուկ ուշադրություն հրավիրելով տնտեսական ֆորումին, որի նպատակն է խրախուսել գործարարների միջև շփումները և մեկնարկել ֆրանկոֆոն գործարարների ցանց։

Իր ելույթի վերջում ՀՀ դեսպանը ներկաներին մանրամասն ներկայացրեց ՖՄԿ 17-րդ երևանյան գագաթաժողովի նոր հիմնարար փաստաթղթի` «Ապրել միասին» պակտի հայեցակարգը և նպատակները:

ՀՀ դեսպանի ելույթին հաջորդեց ՖՄԿ 17-րդ գագաթաժողովի նախապատրաստական աշխատանքների և Հայաստանի վերաբերյալ պատրաստված ֆիլմի ցուցադրումը:

Ֆրանսիայի դեսպանն իր ելույթում խոսեց Ֆրանկոֆոնիայի շարունակական առաջընթացի մասին, որը կապ է ստեղծում անցյալի, ներկայի և ապագայի միջև, նշելով, որ լեզուներն օգնում են հաղթահարել սահմանները և տարածությունը՝ հնարավորություններ տալով բազմամշակույթ համագործակցության համար:

Միջոցառմանը ներկա էին Արգենտինայի Հանրապետության ԱԳՆ բարձրաստիճան պաշտոնյաներ, Արգենտինայում հավատարմագրված օտարերկրյա պետությունների դեսպաններ, խորհրդարանականներ, արգենտինահայ համայնքի ազդեցիկ ներկայացուցիչներ: