«Շնորհակալ ենք մեզ տրված դիմադրելու ուժի համար, Հրա՛նտ». թուրքական բանտում գտնվող թուրք գործչի նամակը Հրանտ Դինքի մահվան տարելիցի առիթով

Ամիսներ առաջ Ստամբուլում կալանավորված թուրք գործարար, վերլուծաբան և հասարակական գործիչ Օսման Քավալան բանտից նամակ է հղել պոլսահայ լրագրող, «Ակօս»-ի հիմնադիր և նախկին գլխավոր խմբագիր Հրանտ Դինքի մահվան 11-րդ տարելիցի կապակցությամբ:

«Ակօս»-ի էջերում հրապարակված նամակում Քավալան նշում է, որ իր մտերիմ ընկերը եղած Դինքի մահը մեծ հարված էր, սակայն, միևնույն ժամանակ, հանդիսացել է այն ուժի աղբյուրը, որով մինչև օրս իրենք դիմադրում են անօրենություններին:

Օսման Քավալայի նամակը՝

«Սիրելի՛ Հրանտ,

Օնաթ Քութլարից հետո երկրորդ մտերիմ ընկերս ես, որը սպանվեց:

Այն գնդակը, որը զրկեց քեզ քաջությամբ ու սիրով ապրածդ կյանքից, մեզ էլ թողեց դեմ առ դեմ սարսափեցնող, մահացու մի վատության հետ:

Այս ցավը հաղթահարելու համար մենք ջանք գործադրեցինք մեր կյանքը քոնի հետ կապելու, քեզնից ինչ-որ բան վերցնելու համար:

Այն, ինչ վերցրինք քեզնից, մեր ցավը վերածեց մեր խղճի հիմնաքարերի:

Շնորհակալ ենք մեզ տրված դիմադրելու ուժի համար, Հրա՛նտ»: