Անդրե Սիմոնյանին կյանքում պակասում է միայն սերը, ինչը նա դեռ չի գտել

Operative.am-ի հարցերին պատասխանում է ռոք երաժիշտ, «The Beautified Project» ռոք-խմբի հիմնադիր և մենակատար Անդրե Սիմոնյանը:

-Կնկարագրե՞ք Ձեզ 3 բառով:

- Ավելի ճիշտ կլինի, եթե դուք նկարագրեք: Ես այդ հարցին երբեք չեմ պատասխանում, որովհետև կարող է ասեմ այն գիծը, ինչպիսին ուզում եմ լինել, բայց դա չլինեմ ես: Ինքնագովասանքով չեմ սիրում զբաղվել:

- Ամենախենթ քայլը, որ երբևէ արել եք կյանքում և հիշում եք:

-Անցյալ տարի 10 րոպե կախված էի մնացել սարից' վտանգավոր մասում, մինչև գյուղի մարդիկ եկան ու փրկեցին: Բայց հաջորդ օրը գնացի հիվանդանոց և թեստեր հանձնեցի, քանի որ շաքարս բարձրացել էր: ))

-Ինչը՞ երբեք չեք ների:

-Սուտը:

-Իսկ ինչը՞ կարող է ուրախություն պատճառել Ձեզ:

-Սերը հանդեպ այն բաների, որ անում եմ: Կապ չունի դա երգ գրելն է, մի հոգու լավություն անելն է, թե հենց սերը:

-Որտե՞ղ կարելի է տեսնել Անդրեին: Երևանի որ վայրերում եք ավելի հաճախ լինում:

-Սիրում եմ The Green Bean-ը, որովհետև այնտեղ չեն ծխում: Ամռանը սիրում եմ բացօթյա սրճարաններ, բայց Հայաստանի ակումբային կյանքից շատ հեռու եմ: Չեմ սիրում ո'չ երաժշտությունը, ո'չ էլ միջավայրը: Նկուղային շոգ, քրտնած և ծխոտ վայրեր չեմ սիրում:

-Այսինքն Դուք անկաշկանդ լինում եք հանրային վայրերում, և եթե ձեզ մոտենում են երկրպագուները հանգիստ զրուցո՞ւմ եք.

-Այո, դա շատ հաճելի է ինձ համար:

-Ըստ Ձեզ, Անդրեն բեմում և բեմից դուրս նո՞ւյնն է:

-Երբ բեմի վրա ես, ինչքան էլ փորձում ես անկեղծ լինել, մեջը կա դերասանական մի բան: Այսինքն դու մի դիմակի հետևում ես հայտնվում, և ուզում ես' քեզ սիրեն: Ինչքան էլ մարդիկ ասեն' «մենք անկեղծ ենք», միևնույն է փորձում են գրավել ժողովրդի ուշադրությունը և սիրվել: Մենք փորձում ենք բեմական և անկեղծության բալանսը ճիշտ պահել, որպեսզի շատ կեղծ չերևա:

-Ինչը՞ Ձեզ կարող է բարկացնել:

-Անկազմակերպ լինելը, սուտ ասելը: Մարդիկ, որ իրենց «քիթը անիմաստ մտցնում են» կյանքիս մեջ:

-Ամենանյարդայնացնող հարցը, որ Ձեզ տվել են:

-Ե՞րբ եք Եվրատեսիլին մասնակցելու:

-Իսկ ե՞րբ եք մասնակցելու: Պատասխանե՞լ եք այդ հարցին:

-Այո, միշտ նույն պատասխանն է' երբեք:

-Կա՞ Ձեր բնավորության մեջ գիծ, որը կուզենայիք փոխել:

-Այո: ես անչափ էգոիստ եմ: Սիրում եմ, որ առաջին հերթին ամեն ինչն ինձ հարմար լինի:

-Ձեր հարցազրույցներից մեկի ժամանակ այն հարցին, թե ինչո՞ւ եք եկել Հայաստան, Դուք պատասխանել եք, որ ամեն մարդ փնտրում է այն, ինչ չունի: Ես չունեի հայրենիք, դրա համար եմ եկել: Այժմ Դուք այստեղ եք և ունեք հայրենիք: Ի՞նչ չունի Անդրեն հիմա:

-Կյանքում սեր:

-Իսկ ինչո՞ւ չունի սեր:

-Որովհետև դեռ չի գտել: Բարդ է մի քիչ, քանի որ իմ ուշադրությունն ու սերը հիմա դեպի մեր երաժշտությունն է:

-Մի քանի հարց էլ խմբի վերաբերյալ: Գիտեմ, որ պլաններ կան դուրս գալ եվրոպական շուկա, գրավել ոչ թե սփյուռքահայերին, այլ եվրոպացիներին: Կա՞ն կոնկրետ ծրագրեր:

-Այո, մենք ունենք հրավեր 6 տարբեր եվրոպական երկրներից: Նրանք սպասում են, որպեսզի մեր նոր ալբոմը թողարկելուց հետո կազմակերպենք այդ շրջագայությունը: Հավանաբար դա կլինի հոկտեմբերի երկրորդ կեսից մինչև նոյեմների կեսը, իսկ համերգները կսկսվեն Վիեննայից և կավարտվեն Լոնդոնով: Դեռ վերջնական պայմանագրերը ստորագրված չեն, այդ իսկ պատճառով շատ քաղաքների անուններ առայժմ չեմ ուզում նշել:

-The Beautified Project-ը իր համերգներին պարբերաբար հրավիրում է երիտասարդ և տաղանդավոր կատարողների: Դուք փորձում եք նոր անուններին մտցնել շոու բիզնե՞ս և ավելի լսելի՞ դարձնել իրենց անունը:

-Մենք փորձում ենք այդ տաղանդավոր մարդկանց բեմահարթակ տրամադրել' հեռու պահելով շոու բիզնեսից: Այսինքն' հայտնվելով որակով հանդիսատեսի առջև` իրենք կզգան, որ դա ավելի հաճելի է, քան լինել մի սուտ միջավայրի մասնիկը, որը հայկական շոու բիզնեսն է:

Զրուցեց` Սաթինե Թադևոսյանը