Իրանում հայտարարել են թանկացումների դեմ խռովությունների ավարտի մասին

Իսլամական հեղափոխության պահպանության կորպուսի հրամանատար Մոհամադ Ալի Ջաֆարին հայտարարել է, որ խառնակչությունը Իրանում ավարտված է, հայտնում է Вести.ру-ն, հղում կատարելով իրանական Ֆարս գործակալությանը:

«Հայտարարում եմ 2017 թվականի խառնակչության և անկարգությունների տապալման մասին: Բողոքավորների քանակը քիչ էր և ամբողջ Իրանում չգերազանցեց 15 հազարի սահմանը», ասել է Ջաֆարին:

Նրա խոսքերով, երկրում հայտնվել են «Իսլամական պետության» ահաբեկիչներ, որոնք գործում են ԱՄՆ-ի, Իսրայելի և Սաուդյան Արաբիայի հրահանգներով:

Իրանի խոշորագույն քաղաքներում ընդվզումները շարունակվում են 2017թ. դեկտեմբերի 28-ից: Հանրահավաքները ուղեկցվում էին ոստիկանության հետ բախումներով: Վերջին տվյալներով, անկարգությունների ընթացքում զոհվել է նվազագույնը 20 մարդ:

Պատճառներից մեկը, որը մարդկանց ստիպել էր փողոց դուրս գալ սննդի և կոմունալ ծախսերի թանկացումն է: