Երբ հետ եմ նայում, առաջին զգացողությունը զարմանքն է լինում. Քրիստինե Պեպելյան (լուսանկարներ)
Քրիստինե Պեպելյանն անցնող տարում Արամ Ավագյանի հետ ներկայացավ երգի պրեմիերայով՝ «Սիրե՞լ, թե՞ ատել», որն առաջին անգամ նրանք կատարեցին երգահանի հեղինակային երգերի երեկոյին: BRAVO.am-ի հետ զրույցում երգչուհին պատմել է, թե ինչ փուլում են նոր երգի ձայնագրման աշխատանքները, ինչ ձեռքբերումներ է ունեցել այս տարում, ինչպես է դիմավորելու Ամանորն ու ինչ ծրագրեր ունի առաջիկայում:
Նրա խոսքով` երգի գործիքավորումը դեռ արված չէ, քանի որ համերգից հետո Արամը մեկնել է ԱՄՆ` կիսատ թողած գործերն ավարտելու, եւ վերադարձից հետո միայն կկարողանան շարունակել գործիքավորման ու ձայնագրման աշխատանքները.«Չեմ կարծում՝ շատ կուշանա երգը: Հավանաբար, եկող տարվա սկզբին արդեն պատրաստ կլինի թողարկման: Խոսքերի հեղինակն Ավետ Բարսեղյանն է: Ինձ համար էլ էր անակնկալ այդ տեքստը, քանի որ Ավետը «Կամաց-կամաց» երգի շնորհանդեսին ինձ ուղղակի նվիրեց այն: Նա որոշել էր, որ դա այդ օրվա իմ նվերը պիտի լինի: Կարծում եմ` շատ գեղեցիկ, հետաքրքիր ու մտածելու տեղիք տվող երգ է ստացվել: Հույս ունեմ՝ շատ մարդիկ կսիրեն այն»:
Անցնող տարին երգչուհու համար հագեցած ու լավ տարի է եղել՝ համերգային ծրագրերով, նոր երգերով, տեսահոլովակներով եւ այլն: Հույս ունի՝ եկող տարին էլ չի հիասթափեցնի, արդյունավետ կանցնի, ուրախ եւ ամենակարեւորը՝ առողջ տարի կլինի: Ի դեպ, 2017-ին լրացավ Քրիստինե Պեպելյանի բեմական գործունեության 20-ամյակը: Կարծում է՝ այս առիթը նշանավորելու լավագույն տարբերակը համերգով հանդես գալը կլինի.«Ինձ թվում է՝ ամենաճիշտ ու ամենից հավանական տարբերակն է: Համերգն էլ կապված է նրա հետ, որ ժամանակ չենք ունենում, տարբեր տեղեր ենք գնում, երաժիշտները քաղաքում չեն լինում: Այսինքն՝ դրա համար հարկավոր է՝ երկար ժամանակ բոլորս կարողանանք որեւէ տեղ չգնալ ու որեւէ ուրիշ բանով չզբաղվել: Բայց շատ մեծ հույս ունեմ, որ մյուս տարի կկարողանամ գոնե ամփոփել այդ 20-ամյակն ու մտնել իմ գործունեության երկրորդ քսանամյակի մեջ (ժպտում է,- հեղ.)»:
Քրիստինեի խոսքով՝ առաջին զգացողությունը զարմանքն է, երբ հասկանում է, որ այդքան տարի արդեն հետեւում է թողել.«Փառք Աստծո, ես կարող եմ ասել, որ իմ աշխատանքում բավական ձեռքբերումներ եմ ունեցել՝ թեկուզ միայն այն, որ հանդիսատեսն ինձ սիրեց, տեղ տվեց այս իրականության մեջ, իմ երգերը լսեցին, հավատացին ինձ: Գիտեք, շատ կարեւոր է, երբ մարդիկ հավատում են արտիստին: Դա արդեն մեծ բան է, որ պետք է գնահատես, ու ես շատ շնորհակալ եմ դրա համար: Կարծում եմ` այս քսան տարիների համար ես չունեմ ափսոսալու որեւէ բան: Փորձել եմ հնարավորինս չնեղացնել որեւէ մեկին. Խոսքը, բնականաբար, հանդիսատեսի մասին է: Չգիտեմ՝ ստացվել է, թե ոչ, բայց ես հաստատ փորձել եմ»:
Մեր դիտարկմանը, որ նա ամենաշատ զուգերգեր ունեցող արտիստներից մեկն է հայկական իրականության մեջ, երգչուհին խոստովանեց` սիրում է դուետները, ու այնպես չէ, որ դրանք հատուկ նախագծեր են, որ պիտի ինչ-որ առիթով արվեն: Պարզապես սիրում է երգել իր ընկերների հետ, հաճախ կատարում է նաեւ նրանց երգերը.«Ես սիրում եմ, երբ մենք երգում ենք միմյանց երգերը, ինչո՞ւ ոչ»,- ընդգծեց նա:
Ինչ վերաբերում է առաջիկա ծրագրերին ու անելիքներին, ապա կարծում է` դրանք տարվա հետ կգան.«Երգեր կան, որոնք իրենց հերթին են սպասում: «Սիրե՞լ, թե՞ ատել» երգով կսկսենք տարին, բայց էլի նոր գործեր կան հավաքված, որ պիտի արվեն: Կոնսերվատորիայի դասերը բնականաբար կշարունակվեն. ինչպես գիտեք, ես նաեւ դասախոսում եմ այնտեղ: Ուսանողներիս հետ պիտի աշխատեմ: Մի խոսքով` լավ պլաններ կան, ու էլի աշխատանքային տարի կլինի»:
Մանրամասները՝ այստեղ.