Եթե ես հաղթեմ հիմա, ես գիտեմ, որ մեր նոր սերնդին ծանր կացության մեջ եմ դնում. Տիգրան Մանսուրյանը` «Գրեմիի» մրցանակաբաշխությանը հաղթելու մասին

Կոմպոզիտոր Տիգրան Մանսուրյանը երեկ «Գրեմմի» երաժշտական մրցանակաբաշխությանը ներկայացվելու առթիվ լրագրողների հետ զրույցում, խոսելով իր սպասումներից, հնարավոր համարեց նաև, որ մրցանակը չստանա:

«Գիտեք ինչ՝ կյանքն այնպիսի բան է, լինում է, որ ստացվում է, լինում է՝ չի ստացվում։ Պետք է երկու ուղղությամբ էլ լինել սթափ և հանդուրժող: Գերադասելին, իհարկե, ստանալն է: Ճիշտն ասած՝ բացարձակ չեմ ուզում ո՛չ սպասել, ո՛չ հուսալ»,-ասաց նա:

Տիգրան Մանսուրյանը նշեց, որ իր տարիքում սովորաբար այդպես է լինում: «Ես տարեց մարդ եմ արդեն, սրանք երիտասարդության տարիքի անսպասելի մեծ ուրախություններ են, իմ տարիքի համար էլ, բայց ոչ այնպես, ինչպես դա կլիներ, եթե երիտասարդ լինեի»,-ասաց նա:

Հարցին, թե իր տարիքի համար ի՞նչ է հաղթանակը, նա պատասխանեց. «Իմ հաղթանակը.. եթե ես հաղթեի հիմա, ես գիտեմ, որ մեր նոր սերնդին ծանր կացության մեջ եմ դնում, իրենք պիտի աշխատեն՝ իրենք էլ հասնեն, որովհետև արդեն դա նվաճված է, պետք է չափվեն այդ բարձր ձեռքբերմամբ»-ասաց նա: