ԱՄՆ-ն իր պատմական նշանակության օբյեկտները կորցնելու վտանգի տակ է

Համաշխարհային օվկիանոսի մակարդակի բարձրացման հետևանքով‚ որը պայմանավորված է գլոբալ տաքացմամբ‚ ԱՄՆ կարող է զրկվել ավելի քան 13 հազ. պատմական ժառանգության օբյեկտներից՝ երկրի Արևելյան ափամերձ տարածքից: Այսպիսի կանխատեսմամբ են հանդես եկել ամերիկացի մի խումբ գիտնականներ, որոնց ղեկավարում է Թենեսիի համալսարանի հնէաբան Դևիդ Անդերսոնը: Այս մասին հայտնում է «ТАСС»-ը:

Հետազոտությունն իրականացնելիս  գիտնականները հիմնվել են ՄԱԿ-ի կլիմայի փոփոխության հարցերով փորձագետների Միջկառավարական խմբի գնահատականների վրա, որոնց համաձայն՝ 2100 թվականին օվկիանոսի մակարդակի բարձրացումը կկազմի մոտ 1 մետր, իսկ հաջորդ մի քանի հարյուրամյակներին՝ 5 մետր:

«Օվկիանոսի մակարդակի միայն 1 մետրով բարձրանալու դեպքում ջրի տակ կանցնեն ԱՄՆ Արևելյան առափնյա մոտ 13 հազար հնագիտական պեղումների վայրեր, հնագիտական և պատմական տեսարժան վայրեր»,- նշված է խմբի զեկույցում:

Ըստ տվյալների՝ եթե օվկիանոսի մակարդակը բարձրանա 3 և ավելի մետրով, ապա, հնարավոր է՝ ընդհատակ անցնեն Ջեյմսթաունը և Սենթ Օգասթինը, որոնք ամերիկյան հողում եվրոպացիների առաջին բնակավայրերն են: Նաև Ֆլորիդայում Կանավերալ հրվանդանի վրա գտնվող ամբողջ տիեզերակայանը կարող է նուն բախտին արժանանալ: