Ջիգարխանյանի նախկին կինը պատմել է դերասանի հետ սեռական կյանքի և երեխա ունենալու ցանկության մասին

Վիտալինա Ցիմբալյուկ-Ռոմանովսկայան մեծ հարցազրույց  է տվել «Կին. սիրո պատմություն» հաղորդման ժամանակ‚ որը եթերում կլինի այսօր: Այս մասին գրում է Actualnews.org-ը:

Իսկ մինչ այդ որոշ հատվածներ հայտնվել են «Комсомольская правда»-ի կայքում: Հաղորդման ընթացքում Ջիգարխանյանի նախկին կինը շեշտը դրել է մեկ բանի վրա. ինքն իրեն մեղավոր չի ճանաչում տեղի ունեցածի հարցում և ոչ մի բանի համար չի զղջում: Երիտասարդ կնոջ խոսքով՝ ինքը ոչ մի վատ բան չի արել‚ հակառակը‚ շատ բան է արել թատրոնի համար և հպարտանալու առիթ ունի:

Նա նշել է‚ որ իսկապես սիրել է հայտնի դերասանին: Նրանք ծանոթացել են‚ երբ Վիտալինան 16 տարեկան է եղել: Այդ ժամանակ նա առաջին անգամ տեսել է Ջիգարխանյանին և միանգամից հասկացել‚ որ «դա վերջն է»: Ներկայացումից հետո սպասել է դերասանին և ինքնագիր խնդրել: Ինչ-որ պահի տարօրինակ զգացում է ունեցել‚ որ ինքը պետք է նրա կողքին լինի‚ այլապես կյանքը չի ստացվի:

Վիտալինան կարծում է‚ որ Ջիգարխանյանը նրանից երեխաներ էր ուզում‚ սակայն դա չէր կարող տեղի ունենալ: «Հիմարություն է այժմ դրա մասին խոսել‚ սակայն պարզապես պետք էր փորձել սկսել դրանով զբաղվել»‚- խոստովանել է դաշնակահարուհին: