Լեոնիդ Ազգալդյանի անունով Լենինգրադյանն է պետք վերանվանել, ոչ թե 700 մետրանոց փողոցը. Անահիտ Բախշյան
Երևանի Սարալանջ փողոցից մինչև Լեռ Կամսարն ընկած ճանապարհահատվածն այսօր` նոյեմբերի 28-ին, անվանակոչվեց Լեոնիդ Ազգալդյանի անունով:
Ավագանու «Ելք» խմբակցության անդամ Ալեն Սիմոնյանն հետաքրքրվեց` արդյոք հանրության կարծիքն հաշվի առնվել է այդ փողոցը Լեոնիդ Ազգալդյանի անունով անվանելու հարցում:
Ավագանու «Հանրապետական» խմբակցության անդամ Գագիկ Բաղդասարյանը նշեց, որ անձամբ է ընդունել նախաձեռնությանը դեմ դուրս եկած քաղաքացիներին, նրանց հետ զրուցել է և եկել են համաձայնության փողոցը Լեոնիդ Ազգալդյանի անունով անվանակոչելու:
Ավագանու «Երկիր ծիրանի» խմբակցության անդամ Մարինա Խաչատրյանն էլ նշեց, որ իր համար անհասկանալի է «նեղ և ճմռթած» փողոցը Լեոնիդ Ազգալդյանի անունով անվանակոչելը: Նա նշեց, որ իրենց խմբակցությունը չի մասնակցելու քվեարկությանը:
Ավագանու «Հանրապետական» խմբակցության անդամ Հասմիկ Սարգսյանն էլ ավագանու ընդդիմադիր խմբակցության անդամներին սթափության կոչ արեց. «Իրենց ապրած կյանքով, ստեղծածով, հակապետական դիրքորոշումներով ոչ մի ներդրում չունեն պետականության կառուցման հարցում, բայց այսօր ամպագոռգոռ ելույթներ են ունենում: Սթափվեք, ժամանակն է»:
Քաղաքապետ Տարոն Մարգարյանը Հասմիկ Սարգսյանի ելույթի ժամանակ ընդմիջեց նրան` ասելով. «Մի քիչ ցածր էլ խոսաս կլսվի»:
Այնուհետև ավագանու «Ելք» խմբակցության անդամ Անահիտ Բախշյանը ներկայացրեց իրենց խմբակցության նախաձեռնությունը նույն հարցի վերաբերյալ` Երևանի Լենինգրադյան փողոցը Լեոնիդ Ազգալդյանի անունով վերանվանելու վերաբերյալ:
«Ես տեսել եմ, թե ինչպես էր գիշերը ժամը 01:00-ին Լեոնիդ Ազգալդյանը սահման գնացող տղաներին քաջալերում, հիշում եմ` ինչպես էինք նրանց ճանապարհում: Ազգալդյանի անունը շատ զորավոր էր, այն ժամանակ նրա անվան շուրջ այնպիսի զինվորներ և մտավորականներ էին հավաքվում, որ զարմանալի էր: Լեոնիդ Ազգալդյանի անվան ավելի անվանի փողոց է պետք անվանակոչել, օրինակ` ինչպիսին Լենինգրադյանն է, ոչ թե 700 մետրանոց փողոցը: Մտածում եք, որ ռուսները կնեղանան, բայց չի կարելի այդ մտածելակերպով սահմանափակվել, հիմա պատկերացրեք, որ Մաշտոցի փողոցը Լենինի փողոց մնացած լիներ: Ես ուզւոմ եմ ասել, որ այսօր չի լինի, բայց վաղը կլինի «Հանրապետականներ»:
Նշենք, որ Երևանի ավագանու մշակույթի հանձանժողը «Ելքի» այս նախաձեռնությանը բացասական եզրակացություն է տվել:
Ի վերջո, Երևանի ավագանու անդամների մեծ մասը «կողմ» քվեարկեց Լեոնիդ Ազգալդյանի անունով Երևանի Սարալանջ փողոցից մինչև Լեռ Կամսարն ընկած ճանապարհահատվածը անվանակոչելուն, ոչ թե Լենինգրադյան փողոցը: