Գյումրիի տեխնոլոգիական կենտրոնում ՏՏ ինկուբացիոն լաբորատորիա է բացվել

ՀՀ տարածքային կառավարման և զարգացման նախարար Դավիթ Լոքյանը հոկտեմբերի 25-ին ներկա է գտնվել Գյումրիի տեխնոլոգիական կենտրոնում ՏՏ ինկուբացիոն լաբորատորիայի բացման արարողությանը։ Միջոցառմանը ներկա էին նաև Հայաստանում Եվրոպական միության դեսպան Պյոտր Սվիտալսկին, Շիրակի մարզպետ Արթուր Խաչատրյանը, Մայքրոսոֆթ ինովացիոն կենտրոնի տնօրեն Արտաշես Վարդանյանը, տեղական և պետական կառավարման մարմիններից, ՏՏ սեկտորի առաջատար ընկերություններից ներկայացուցիչներ:

ԵՄ-ի և ՀՀ տարածքային կառավարման և զարգացման նախարարության կողմից ֆինանսավորվող «Տեխնոլոգիական զարգացման խթանումը Շիրակի մարզում» ծրագրի շրջանակում հիմնված լաբորատորիան մարզի 17-35 տարեկան գործազուրկներին կտրամադրի տեղեկատվական տեխնոլոգիաների 5-ամսյա դասընթաց: Ծրագիրը, որը ներառելու է շուրջ 200 մասնակից, համագործակցում է տեղական ՏՏ ընկերությունների հետ՝ բացահայտելու նրանց մարդկային ռեսուրսների պահանջարկը, և դրա հիման վրա կրտսեր ծրագրավորողներ է պատրաստում: Դասընթացի առաջին փուլն արդեն ավարտված է, ինտենսիվ ուսուցման ծրագիրն անցել է ավելի քան 50 մարդ, ովքեր նոյեմբերի սկզբից կմասնակցեն իրենց պոտենցիալ գործատուների կողմից տրամադրվող գործնական աշխատանքների փուլին: Ծրագիրն ակնկալում է ունենալ տեղական ընկերություններում աշխատող մոտ 90 ՏՏ մասնագետներ:

Նախարար Դավիթ Լոքյանը ողջունել և կարևորել է կենտրոնի բացումը և ասել, որ այս ծրագրով փորձում են Շիրակի մարզում լուծել երիտասարդների գործազրկության խնդիրը, բարելավել նրանց գիտելիքներն ու հմտությունները ՏՏ ոլորտում, որն այսօր առաջնային է Հայաստանի համար: Նշելով‚ որ մարզում մեկ շնչին բաժին ընկնող ՀՆԱ-ն ամենացածրն է Հայաստանում, նախարար Լոքյանը հայտարարել է, որ Կառավարությունն իր առջև խնդիր է դրել մինչև 2025 թվականը բարելավել վիճակը: 

Ելույթ է ունեցել նաև Դեսպան Սվիտալսկին ասելով‚ որ ծրագրի նպատակն է ավելացնել բարձրորակ արտադրանք թողարկող փոքր բիզնեսների քանակը, ինչպես նաև հզորացնել Շիրակի մարզի երիտասարդ մասնագետների հմտությունները ՏՏ ոլորտում՝ որպես տնտեսական աճի և համապարփակ զարգացման խթան:

Շիրակի մարզպետ Արթուր Խաչատրյանն էլ իր հերթին շնորհավորել է նոր ձեռնարկի իրականացման կապակցությամբ, նկատել, որ Շիրակի մարզը միշտ աչքի է ընկել մտավոր մեծ հնարավորությամբ, նորարարություններով ու նորը ստեղծելու ջիղով: :

Բացման ելույթներից հետո տեղի է ունեցել կարճատև շրջայց, որի ընթացքում լսարանին ներկայացվել է լաբորատորիայի նպատակը և գործառույթները: Ապա նախագիծը հայտարարել է ենթադրամաշնորհի արդյունքները: 7 տեղական ՏՏ ընկերություններ 5,000-10,000 եվրոյի սահմաններում դրամաշնորհներ կստանան` իրենց գործունեության ընդլայնման եւ ծրագրի աշխատակիցների համար նոր աշխատատեղերի ստեղծման նպատակով: