Հայաստանը մտադիր է զարգացնել հարաբերությունները ԵՄ-ի հետ. Էդվարդ Նալբանդյան
Հայաստանը մտադիր է զարգացնել հարաբերությունները ԵՄ-ի հետ: Այս մասին, այսօր՝ հոկտեմբերի 2-ին, Երեւանում Եվրոպական հանձնաժողովի հարեւանության եւ ընդլայնման հարցերով հանձնակատար Յոհանես Հանի հետ համատեղ ասուլիսի ժամանակ հայտարարել է ՀՀ ԱԳ նախարար Էդվարդ Նալբանդյանը:
Նա իր խոսքոuմ, ողջույնի խոսքից հետո նշել է.
«Հայաստանը սերտ կապեր ունի Եվրոպական Միության հետ եւ մտադիր է ընդլայնել համապարփակ համագործակցությունը փոխադարձ հետաքրքրություն ներկայացնող բոլոր ոլորտներում:
Եվրոպական Միությունը արժեքավոր աջակցություն է ցուցաբերում մեր երկրում ընթացող բարեփոխումներին՝ սատարում մարդու իրավունքների պաշտպանության եւ օրենքի գերակայության շարունակական խթանման, ժողովրդավարական հաստատությունների առավել ամրապնդման, դատական համակարգի ու արդյունավետ կառավարման բարելավման ուղղությամբ Հայաստանի կողմից իրականացվող ջանքերին: Ես կցանկանայի ընդգծել մեր համագործակցությունը ապրիլին Հայաստանում կայացած խորհրդարանական ընտրությունների համատեքստում»։
Նախարարը հավելել է.
«Բրյուսելյան գագաթաժողովի նախապատրաստական աշխատանքները կարեւոր տեղ էին զբաղեցնում հանձնակատար Հանի հետ մեր քննարկումներում։ Մենք մտքեր փոխանակեցինք գագաթաժողովի Եզրափակիչ հռչակագրի շուրջ։
Հայաստան-Եվրամիություն օրակարգում կարեւոր տեղ է զբաղեցնում մարդկանց միջեւ շփումների խրախուսումը։ Վիզային ռեժիմի ազատականացումը հանդիսանում է շարժունակության ու մարդկանց միջեւ շփումների խորացման կարեւոր բաղադրիչներից մեկը, ինչն ամրագրված է Վիլնյուսի ու Ռիգայի գագաթաժողովների հռչակագրերում:»
«Մենք մտքեր փոխանակեցինք ոլորտային փոխգործակցության շուրջ, անդրադարձանք «20 արդյունք մինչեւ 2020» փաստաթղթին, որը նախանշում է Արեւելյան գործընկերության շրջանակներում գալիք երեք տարվա հիմնական ուղղությունները:»
Իր խոսքի վերջում Նալբանդյանը հավելեց.
«Պարոն Հանը վերահաստատեց Եվրամիության անվերապահ ու ամբողջական աջակցությունը ԵԱՀԿ Մինսկի խմբի համանախագահ երկրների ջանքերին։»
Հանձնակատար Հանի հետ հանդիպման ընթացքում քննարկվեցին նաեւ հրատապ միջազգային խնդիրները, մերձավորարեւելյան զարգացումները, իրանական միջուկային ծրագրի շուրջ պայմանավորվածությունների կատարման ընթացքը, իրավիճակը կորեական թերակղզում։