Սոնա Շահգելդյանը և պրոդյուսեր Սամվել Ղազարյանն ընկերություն են անում

Սոնա Շահգելդյանի անձնական կյանքը վերջին ժամանակներում հանրության ուշադրության կենտրոնում է: Երգչուհու ֆեյսբուքյան էջում ցանկացած լուսանկար ասեկոսեների տեղիք է տալիս: Մեր շոու բիզնեսի շատ ներկայացուցիչները երբեմն լուսանկարներ են տեղադրում իրենց ֆեյսբուքյան էջերում' հանրության ուշադրությունը գրավելու և որպես PR գործիք կիրառելու նպատակով, բայց, ինչպես ArmStar.am-ի հետ զրույցում նշեց Սոնան, ինքը PR-ի կարիք չունի:

Ժամեր առաջ Սոնան փոխեց իր անձնական լուսանկարը: Լուսանկարում երգչուհին Սամվել Ղազարյանի հետ է, ով երգիչ Գևորգ Մարտիրոսյանի պրոդյուսերն է և N-Show ակումբի տնօրենը, որտեղ էլ աշխատում է Սոնան: «Մեզ մոտ կան շատ մարդիկ, ովքեր հենց այդ նպատակով են նկարներ տեղադրում իրենց էջերում, բայց ես դա արել եմ, որովհետև թաքցնելու ոչինչ չունեմ, մենք չենք վախենում»:

ArmStar.am-ի այն հարցին, թե Սամվելն է այն տղամարդը, ով գրավել է Սոնայի սիրտը, երգչուհին պատասխանեց. «Ես ուզում եմ իմ անձնական կյանքը փակ պահել: Երբ լուսանկարը դնում էի, գիտեի, որ շատ լրատվամիջոցներ կհետաքրքրվեն, բայց ասեմ ձեզ, որ ես վախենալու կամ թաքցնելու բան չունեմ: Այո', ես սիրում եմ, ոչ թե սիրահարված եմ, այլ սիրում եմ: Մենք միասին ենք որոշել այդ լուսանկարը տեղադրել»:

Թեև Սոնան սկզբում չէր ցանկանում փակագծերը բացել, այնուամենայնիվ անկեղծացավ. «Ես ապագայի հետ կապված դեռ ոչինչ չեմ ուզում խոսել' ամուսնություն և այլն, չգիտեմ, թե ինչպես կընթանան մեր հարաբերությունները, բայց ասեմ, որ ես հարաբերություններում գնահատում եմ անկեղծությունը, հարգանքը, փոխադարձ սերը: Ես միասեր մարդ եմ, եթե իմ սիրտը մեկին կպնում է, ընդմիշտ է կպնում: Սերն այն զգացմուքն է, որից պետք չէ վախենալ, կամ պետք թաքցնել: Եթե Սամվելը չուզենար, որ ես հրապարակեի այդ լուսանկարը կամ եթե մենք թաքցնելու բան ունենայինք, ես ուղղակի չէի դնի դա իմ էջում»:

Սոնայի ու Սամվելի լուսանկարի տակ անգամ բարեմաղթանքներ կային, լայքերն էլ շատ են: «Սամվելին էլ, ինձ էլ հաճելի է մեր համատեղ նկարը հրապարակելը: Ես արդեն չեմ վախենում մեր հարաբերությունների մասին բարձրաձայնելուց, ինձ համար սիրուց լավ բան չկա: Շատ-շատերը գիտեին մեր հարաբերությունների մասին, խոսում էին»: Սոնան, ինքը թեև անսահման նվիրված է իր սիրուն, բայց պարզաբանեց նաև, որ ռեալիստ է, ու եթե հարաբերություններում ամեն բան լավ չընթանա, ուղղակի չի ցանկանա այդ մարդու կողքին լինել. «Ես իմ տեսակով այնպիսին եմ, որ եթե անընդհատ կռվել-բարիշել, կռվել-բարիշել լինի, ես չեմ ցանկանա լինել այդ մարդու կողքին, ես խաղաղ ու անկեղծ հարաբերությունների կողմնակից եմ, ես ռեալիստ եմ»,-ասաց երգչուհի Սոնա Շահգելդյանը:

Զրուցեց Աշխեն Մնացականյանը