Դիանա Գրիգորյանի և Արտաշես Ալեքսանյանի միջև կոնֆլի՞կտ է եղել. Ինչո՞ւ վերջինս նոր սերիալում չի նկարահանվելու

Aysor.am-ը գրում է. Հայկական հեռուստաընկերություններն իրենց նոր եթերաշրջանների մեկնարկն ազդարարեցին նաև սերիալային առատությամբ: Մերօրյա ամենաակտիվ սցենարիստներից մեկի՝ Դիանա Գրիգորյանի «Առաջնորդներին» Արմենիա հեռուստաընկերությամբ փոխարինելու եկավ նույն սցենարիստի «Նռան հատիկը», որում նկատելի է այն դերասանների բացակայությունը, ովքեր նախկին գրեթե բոլոր նախագծերում համագործակցել են վերջինիս հետ:

Ի դեպ, «Առաջնորդների» ավարտն ամբողջացնող տեսանյութում, որտեղ բոլոր արտիստները խոսում էին իրենց կերպարների մասին, դերասան Արտաշես Ալեքսանյանն ակնարկեց՝ հաջորդ նախագծում ինքն ընդգրկված չի լինի: Այս հայտարարությունը որոշակի ասեկոսենարի պատճառ դարձավ. արդյոք դերասանն ու Դիանա Գրիգորյանը որոշակի տարաձայնություններ ունեն:

«Որևէ կոնֆլիկտ, նեղվածություն չկա իմ հայտարարության հիմքում, պարզապես, ի տարբերություն ոմանց, ես նախօրոք կանխազգում եմ, թե ինչ է լինելու: Նաև՝ արդեն առաջարկներ ունեի, ու ժամանակն էր ընտրելու դրանցից մեկը», - կայքի հետ զրույցում նկատեց Արտաշես Ալեքսանյանը:

Դերասանն այժմ նկարահանվում է նոր սերիալում, որի մասին փակագծերը դեռևս չի կարող բացել: Միայն տեղեկացրեց, որ սերիալն էկրաններին կլինի, հավանաբար, մեկ ամսից:

«Առաջարկներ շատ ունեի, բայց ընտրությունս կանգ առավ հենց այս սերիալի վրա: Այժմ նախապատրաստական շրջանում ենք, հոկտեմբերից հեռուստադիտողը հնարավորություն կունենա գնահատել մեր աշխատանքը: Չեմ կարող հստակեցնել՝ կերպարս դրակա՞ն է, թե՞ բացասական: Ցանկացած մարդ իր կյանքում երկու տեսակների էլ կրողն է՝ նայած իրավիճակի: Բայց վստահեցնում եմ՝ հեռուստադիտողին հետաքրքիր, գեղեցիկ ու ամենակարևորը՝ ասելիքով նախագիծ է սպասվում», - ընդգծեց նա:

Մանրամասները` այստեղ.