Վարչապետը նախարարներին հանձնարարել է միայն «Հայաստանի Հանրապետություն» օրաթերթ կարդալ
Armtimes.com-ը գրում է.Հայաստանի Հանրապետության վարչապետ Կարեն Կարապետյանի հանձնարարականով` նախարարությունները եւ առընթեր մարմինները 3-4 անգամ նվազեցրել են օրաթերթերի բաժանորդագրության համար նախատեսված գումարներն: Նպատակը խնայողություն է: Կարապետյանի հանձնարարականի արդյունքում յուրաքանչյուր նախարարության կողմից մեկ տարվա համար նախատեսված բոլոր օրաթերթերի մոտ 500 հազար դրամը դարձել է 100 հազար դրամ:
«Տարվա սկզբից վարչապետը հանձնարարել է կրճատել մամուլին հատկացվող բյուջները, շատ քիչ գումար է թողել թերթերի համար: Եթե այն ժամանակ յուրաքանչյուր նախարարություն տարվա կտրվածքով բաժանորդագրվում էր բոլոր օրաթերթերին եւ վճարում 400-450 հազար դրամ, ապա հիմա այդ գումարը դարձել է 100 հազար դրամ եւ բավարարում է միայն երկու օրաթերթի»,- ասում է ՀՀ կառավարության մեր աղբյուրը:
Կարապետյանի կառույցից մեկ հետաքրքիր տեղեկություն էլ փոխանցեցին, որ ձեռք բերվող օրաթերթերից մեկը պարտադիր պետք է լինի իշխանաության գովաբանությամբ զբաղվող «Հայաստանի Հնրապետություն» օրաթերթը:
«Պարտադրված է, որ այդ թերթերից մեկը պետք է լինի «Հայաստանի Հանրապետությունը» եւ մյուսն էլ ինչ ցանկանան: Նախարարություն կա, որ «Հայաստանի Հանրապետության» հետ «Առավոտ» է վերցնում, «Ժողովուրդ», «Հայկական ժամանակ» կամ էն ինչը ուզում են: Նախարարություներ էլ կան, որ արտաբյուջետային միջոցներով ուրիշ թերթերի էլ է բաժանորդագրվում, բայց 80 տոկոսը երկու թերթից ավելի չեն վերցնում»,- ասում է մեր աղբյուրը եւ միաժամանակ տեղեկացնում, որ կառավարությունից, թեեւ նախարարություններին նման հրահանգ են տվել, բայց շարունակում են իրենք մի քանի միլիոնի թերթ ձեռք բերել :
«Կառավարությունը նախկինի նման վերցնում է բոլոր թերթերից`մի քանի օրինակով: Չգիտեմ, թե որքան է ընդհանուր գումարը, բայց գիտեմ, որ միլիոնների հասնում է: Առընթեր մարմիններ եւս կրճատել են մամուլին հատկացվող գումարների չափը»,- ասում է կառավարության աղբյուրը:
Մինչ վարչապետը նախարարություններին հրահանգում է, որ թերթերին հատկացվող գումարները կրճատեն, միայն իշխանամետ թերթի հոդվածները կարդան, այդ ընթացքում մշակույթի նախարարությունն աջ ու ձախ մի քանի տասնյակի հասնող միլիոններ է բաժանում`իր գովքն անող լրատվամիջոցներին:
Նախարարությունը ֆինանսավորում է ընդհանուր առմամբ 65 լրատվամիջոցի, որից երկուսը պետական են, մյուս 63՝ մասնավոր: Մշակույթի նախարարությունը պետական լրատվամիջոցներին հատկացնում է 73 միլիոն 65 հազար 300 դրամ, որից՝ 46,867 մլն դրամը հասնում է «Հանրապետություն» ՓԲԸ-ի «Հայաստանի Հանրապետություն» օրաթերթին, իսկ 26,17 մլն-ը՝ «Հայաստանի Հանրապետություն-Ռեսպուբլիկա Արմենիա» ՓԲԸ-ին, որը ռուսալեզու «Ռեսպուբլիկա Արմենիա» էլեկտրոնային թերթի հիմնադիրն է:
63 ոչ պետական լրատվամիջոցներին բաժին է հասնում եւս 49,77 մլն դրամ: Այս լրատվամիջոցներից 14-ն ազգային փոքրամասնությունների լեզվով լույս տեսնող թերթերն են, որոնց նշյալ գումարից բաժին է հասնում 11,77 մլն դրամ:
Հետաքրքիր է, բայց այստեղ կրկին արտոնյալ է «Հյաստանի Հանրապետություն» օրաթերթը: