Առավոտից միչև հիմա մարդկանց անտեղի անջուր թողնելը, մեղմ ասած, մարդկային չէ

Շատերի մոտ մի տարածված միֆ կա թե Հայաստանում արտասահմանյան ընկերություններից վատ են աշխատում միայն ռուսականները։ Դա հատկապես վերաբերվում է հանրային ծառայություններ մատուցող ընկերություններին։ Սակայն այդ միֆը ցրում է «Վեոլիա ջուր»-ը։

Այս ընկերության անփույթ աշխատանքի պատճառով շատերի նման մենք էլ տարվա մեջ շատ անգամ ջրի խնդիր ենք ունենում։
Ուրեմն այս ընկերության աշխատողները մի երկու տարի առաջ մեր կողմից բավականին մեծ գումարներով քաշած նոր ջրագծի վրա եկան հոր սարքեցին։ Այնտեղ դրեցին ջրաչափերը իրենց փականներով, իսկ հորը փակվում է մի թիթեղի կտորով՝ առանց կողպեքի։

Այսինքն այն երբ ու ով ուզի՝ կբացի։ Դրա հետևանքով անընդհատ չգիտես ով տարբեր մարդկանց ջուրը փակում է։ Մեր հարևաններից մեկի ջուրը մի շաբաթ շարունակ օրը երկու անգամ գալիս անջատում էին։ Ընկերությունից ասում էին իրենք կապ չունեն ու չգիտեն ով է։ Ու այդ հորը մինչև օրս այդպես անտեր մնում է նույն խնդրով։

Այս ընկերության ոչ կոմպետենտ, իրենց գործին չտիրապետող աշխատողները առանց զգուշացնելու առավոտից ջուրը կտրել էին ու գործ էին անում այդ հորի մոտ։ Երեկոյան հերթական անգամ հարցնելուց հետո թե երբ կտան ջուրը, ասեցին շուտով կլինի։

Միացրեցին, բայց ուղիղ 3 րոպե հետո կտրեցին։ Երբ գնացի իրենց աշխատանքի վայրը՝ մարդ չկար։ Զանգում եմ իրենց համարներով։ Հազիվ մի համարով պատասխանում են։ Բացատրում եմ, որ իրենց աշխատողները այդ ամենից հետո չգիտես ինչու փակել են փականը ու գնացել տուն։

Առավոտից միչև հիմա մարդկանց անտեղի անջուր թողնելը մեղմ ասած մարդկային չէ՝ հատկապես, երբ տանը 9 ամսական երեխա կա։ Բացատրեցի, որ իրենց համապատասխան աշխատողը թող արագ լուծի այս հարցը։ Ասում են, կփոխանցենք համապատասխան բաժին ու կլուծեն հարցը... ե՞րբ: Ասացին չգիտեն երբ։ Հիմա մենք պետք է գիշերով բացենք այդ հորը, իջնենք, գտնենք մեր փականը ու բացենք։ Իսկապես սպասարկման բարձ մակարդակ է։

Այսպես աշխատող ընկերությունները մտածելու բան չունեն. լավ գիտեն, որ այսպիսի դեպքերի համար չեն պատժվելու։ Համբերությանս բաժակը ամեն օր ավելի է լցվում ու ամեն քայլափոխի այս բարդակը անտանելի է դառնում։ Սինգապուր դառնալուն բան չմնաց։

Դավիթ Գևորգյան. Ֆեյսբուք