Նաիրիտից մի քանի 100 մետր հեռավորության վրա ապրող մեծաթիվ բնակչություն կա. պետք է նախազգուշական միջոցներ ձեռք առնել

Այսօրվա հետ կապված...Սինթետիկ կաուչուկի, մասնավորապես ացետիլենից քլորոպրենի ստացման կողմնակի արգասիքներից է լաք-էթինոլը (лак-этиноль):

Բաղադրության մեջ առկա են հիմնականում դիվինիլացետիլենի պոլիմերներ՝ լուծված տոլուոլում կամ քսիլոլում, կայունացված է հակաօքսիդիչ խեժերով և կիրառվում է հակակոռոզիոն/ջրակայուն ծածկույթների պատրաստման համար:

Լաքը շագանակագույն յուղանման հեղուկ է, բոցավառվում է 32օC ջերմաստիճանում (չնայած ջերմաստիճանը մեծապես կախված է բաղադրությունից):
Լաքի կազմության 50-ը խեժային զանգվածն է, որը բաղկացած է 80 % դիվինիլացետիլենի և 20 % տրիմեր-, տետրամեր ացետիլենի պոլիմերներից: Լաքը կարող է պարունակել մինչև 10 % չպոլիմերված տրիմեր-, տետրամեր ացետիլեն:

Վերջիններս բավականին անկայուն նյութեր են, ընդունակ են ինքնաօքսիդացման՝ անկայուն պերօքսիդային միացությունների առաջացումով, որոնք էլ հանդիսանում են լաք-էթինոլի անկայունության պատճառը: Լաք-էթինոլի կայունությունը բարձրացնելու նպատակով ավելացվող կայունացուցիչները կապում են կլանված թթվածինը, կանխելով օքսիդացման պրոցեսները, չնայած դրան լրիվ անվտանգ չեն դարձնում:

Նշված նյութի պայթյունի արդյունքում կարող են առաջանալ ածխաջրածիններ, ջրածին, ջուր, ածխաթթու և շմոլ գազեր, նաև պինդ ածխածին:

Հիմա մեր շենքի վերևում աերոզոլ է, որում պինդ ածխածնի բարձր պարունակությունը կասկած չի հարուցում, իսկ դա առնվազն հանգեցնում է վերին շնչուղիների և թոքերի բորբոքումների:

Չեմ ասում վախեցնենք բնակչությանը, բայց գոնե չասենք հասարակ ծուխ է, մի անհանգստացեք: Նաիրիտից մի քանի 100 մետր հեռավորության վրա ապրող մեծաթիվ բնակչություն կա (մենք էլ ընտանիքով շատ մոտ ենք բնակվում), կարծում եմ, որ պետք է նախազգուշական միջոցներ ձեռք առնել, իսկ ովքեր հնարավորություն ունեն ժամանակավորապես տեղափոխվեն:

Սոֆյա Այդինյան. Ֆեյսբուք