Միջազգային ժյուրիին հիացրել են ոչ միայն տաղանդավոր հայերը, այլև երևանյան տապն ու գեղեցիկ շատրվանները (լուսանկարներ)

Հուլիսի 25-26-ը «Jose» ժամանցային համալիրում տեղի է ունեցել «Կովկասի առաջնություն» 4-րդ միջազգային մրցույթը: Մրցույթին մասնակցել են 16 պետությունից ժամանած երգիչ-երգչուհիներ ՝ թվով 65-72 մասնակից:

Միջազգային ժյուրին ժամանել է 12 երկրից, այդ թվում՝ Մալթայից, Էստոնիայից, Բելառուսից, Լատվիայից, Լիտվայից,Ղազախստանից: Մրցույթը կազմակերպել էր Կատարողական արվեստի համաշխարհային ասսոցիացիան, որի նախագահն է Արման Ղուկասյանը:

Նրա խոսքով՝ բոլոր մասնակիցները միջազգային մրցույթներում բազմակի հաղթողներ են, իսկ ժյուրիի անդամները՝ միջազգային մրցույթի կազմակերպիչներ:

Լիտվացի մեր հյուրը մրցույթից բացի հասցրել է հիանալ Երևանով և հայերով:
«Ես Երևանում առաջին անգամ եմ և հասցրել եմ արդեն հիանալ մարդկանցով, քաղաքով: Ձեր բնությունն ու շոգը, գեղեցիկ շատրվաններն ու մնացած ամեն ինչը ինձ շատ դուր եկան»,-ասել է Աստա Բագդոնավիչիենեն:

Ժյուրիի նախագահը Գայանե Հովհաննիսյանն էր: Ժյուրիի հայ մյուս անդամների թվում էին Մերի Կարապետյանը, Նարինե Զարիֆյանը, Արևիկ Թանաշյանը, Վիգեն Թանաշյանը, Հրանտ Մուրադյանը, Հայկ Մխոյանը, Ռուզաննա Ջամբազյանը: Ադրբեջանին ևս հրավեր է արվել, սակայն հարևան երկիրը, կարծես թե, վախեցել է ներկա գտնվել:

«Կովկասի առաջնություն»-ը իրականացվել է 1 փուլով: Մասնակիցները ներկայացել են 1 երգով՝ հետևյալ տարիքային խմբերում. 6-9, 10-12, 13-15, 16-18, 19-25 և 26-ից բարձր: Մասնակիցների պայքարը տեղի է ունեցել էստրադային, ջազային, դասական, ժողովրդական ժանրերում: Յուրաքանչյուր անվանակարգում շնորհվել է «Գրան պրի»: 8 Գրանպ պրիակիրների պայքարի արդյունքում «Սուպեր գավաթ»-ին արժանացել է Չեխիայի ներկայացուցիչ Չեփթեյա Գերխետան, ով գավաթից բացի, որպես պարգև, ստացել է 500 € :

«Սա շատ լուրջ մրցույթ էր, և մասնակիցնեը շատ ուժեղ էին: Շնորհավորում եմ բոլորին: Չէի սպասում, որ «Սուպեր գավաթը» իմը կլինի, քանի որ չի եղել այնպես, որ այսպիսի մրցույթներում օպերան հաղթի»,- ասաց Չեփթեյա Գերխետան:

Հայ և օտարերկրյա ժյուրին միասին համերաշխ են աշխատել: Մեր թղթակցի հետ զրույցում նրանք բոլորը նշել են, որ մրցույթ փառատոնը կազմակերպված էր հավուր պատշաճի և արժանի էր ավելի լայն լսարանի: Ժյուրիի անդամները առանձնահատուկ նշել են Ղազախստանի պատվիրակության մասնակցության մասին, ովքեր բոլորին հմայել էին մրցույթին իրենց լուրջ վերաբերմունքով:

Ժյուրիի հայ անդամների խոսքով՝ հայ մասնակիցներ գնալով ավելի ուժեղ մրցակիցներ են դառնում: Ռուզաննա Ջամբազյանի խոսքով՝ պետք է ուշադրություն դարձնել երգերի ընտրությանը. Նա խորհուրդ տվեց ավելի շատ հայկական երգեր ընտրել, որոնք ավելի դժվար է կատարել և որ միջազգայն մրցույթներում արժե ներկայացնել մերը՝ հայկականը:

«Որքան էլ հայերը տառապել ու դժվարին կյանք են ունեցել, միևնույնն է՝ ամուր կանգնած են իրենց ոտքերի վրա: Շատ ընկերասեր, հյուրասեր ու ուրախ ժողովուրդ են: Ես կցանկանայի, որ մյուս ազգերն էլ այսպիսին լինեն»,- հայերի մասին այսպես է արտահայտվել Վասիլի Բոբեյկան Ռոմանիայից:

Շնորհավորում ենք մրցույթ-փառատոնի հաղթողներին և մաղթում նորանոր հաղթանակներ: