Կարապի լճի տարածքում անցկացվել է ավանդական դարձած «Պարում է Երևանը» միջոցառումը(լուսանկարներ)
«Երևանյան ամառ 2017». Կարապի լճի տարածքում անցկացվել է ավանդական դարձած «Պարում է Երևանը» միջոցառումըԵրևանի քաղաքապետարանի «Երևանյան ամառ 2017» եռամսյա միջոցառումների ծրագրի շրջանակում Կարապի լճի տարածքում անցկացվել է արդեն ավանդական դարձած և սիրված ազգագրական ու ժողովրդական պարերին նվիրված «Պարում է Երևանը» միջոցառումը, որն այս տարի կրում էր «Ուս-ուսի» խորագիրը: Միջոցառմանը ներկա է գտնվել նաև Երևանի քաղաքապետարանի աշխատակազմի մշակույթի վարչության պետ Ռուբեն Հովհաննիսյանը:
Միջոցառման ընթացքում գեղեցիկ և հետաքրքիր կատարումներով հանդես են եկել «Կարին» ավանդական երգի-պարի համույթի, ինչպես նաև «Ակն», «Նժդեհ» և մի շարք այլ համույթների անդամներ:
«Պարում է Երևանը» միջոցառման ժամանակ անցկացվել է նաև ազգագրական և ժողովրդական պարերի բաց դաս, որի ընթացքում բոլոր ներկաները հնարավորություն են ունեցել սովորելու պարերի շարժումները:
Հետաքրքիր պարային կատարումներն անտարբեր չեն թողել նաև մայրաքաղաքի հյուրերին: Բազմաթիվ զբոսաշրջիկներ, ոգևորվելով տիրող մթնոլորտից, միացել են միջոցառմանն ու պարել հայկական ազգագրական պարեր:
Մասնակիցների բարձր տրամադրությունը հերթական անգամ փաստում է, որ «Պարում է Երևանը» միջոցառումը դարձել է ոչ միայն մայրաքաղաքի բնակիչների, այլ նաև բազմաթիվ հյուրերի ամենասպասված միջոցառումներից մեկը: