Նույնիսկ զինված բախման դեպքում գլուխ կտրելը արտառոց երևույթ է, ԵԽ-ն դա թույլ տալ չի կարող

Այսօր՝ հուլիսի 25-ին, լրագրողների հետ հանդիպման ժամանակ «Ընդդեմ իրավական կամայականության» հասարակական կազմակերպության գործադիր տնօրեն Լարիսա Ալավերդյանը հայտնեց, որ Ապրիլյան պատերազմի զոհերի, վիրավորների իրավունքների պաշտպանության հետ կապված Ադրբեջանի դեմ 700-ից ավելի հայց է ներկայացվել Եվրոպական դատարան:

«Ադրբեջանցիները պլանավորված և երկար ուսումնասիրելուց հետո են գործել, ինչը մենք ապացուցված ենք համարում: Այդ մասին ասեմ, որ ֆիլմ էլ է նկարահանվել՝ «Ապրիլյան երկրորդ օրը» անվանումով», - նշեց Ալավերդյանը:

Նա հավելեց, որ այժմ Եվրոպական դատարանից արձագանքի են սպասում:

Ապրիլյան պատերազմի օրերին շփման գծում փաստահավաք առաքելություն կատարած իրավաբան Արա Ղազարյանի խոսքով՝  սկզբում Ապրիլյան պատերազմի զոհերի վերաբերյալ ՄԻԵԴ  են ներկայացվել 21 հայց, Խալափյանների ընտանիքի վերաբերյալ 3 գանգատ, այնուհետև՝ 359 գանգատ տեղահանված բնակիչների կողմից: Անցյալ ամիս ՄԻԵԴ է ուղարկվել նաև դեկտեմբերին Չինարիում տեղի ունեցած դիվերսիոն գործողության դեպքի մասին գանգատը:

«Նույնիսկ զինված բախման դեպքում գլուխ կտրելը արտառոց երևույթ է: Եվրոպայի խորհուրդը չի կարող թույլ տալ, որ իր տարածքում նման դեպքեր տեղի ունենան», - ընդգծեց Ղազարյանը՝ հավելելով, որ միջազգային կառույցները արցախյան հակամարտության հարցում միշտ փորձում են որոշակի հավասարություն դնել կողմերի միջև, սակայն հարցին այլ տեսանկյունից նայելու դեպքում նրանք կհասկանան, որ ղարբաղյան հակամարտությունը փրկության, այլ ոչ թե տարածքներ գրավելու խնդիր է: