«Google»-ը բոլորին հրավիրել է Դիմա Բիլանի թաղմանը

Ռուս երգիչ Դիմա Բիլանին բարկացրել են իր մահվան մասին լուրերը, որոնք համացանցում են տարածվել «Google»-ի « AdSense» գովազդային ծառայության աշխատանքի խափանումների հետևանքով: Այս մասին հայտնում է «Medialeaks»-ը:

Ինստագրամյան իր էջում երգիչը գրել է, որ արդեն հոգնել է Աֆրիկայում իր բուժման և թաղման մասին տեղեկություններից:

«Մարդկային հիմարությունն ինձ հունից հանում է, պե՞տք է նման բան հորինել, թե մեկնում է Աֆրիկա բուժման, երևի թե բժիշկ «այբոլիտի» մոտ...»,- գրել է երգիչը:

Ինչպես նշում է «Medialeaks»-ը՝ շուրջ կես տարի առաջ համացանցի օգտատերերը սկսեցին ուշադրություն դարձնել տարօրինակ հայտարարություններին, որոնք «պետք է ապշեցնեն և ստիպեն մարդկանց քլիք անել հղումով»: Դրանցից որոշները նմանատիպ տեքստ ունեն. « Այսօր Դիմա Բիլանի հոգեհանգիստն է: Հիվանդությունը տարավ երգչին: Հոգնածությունն է ամեն ինչում մեղավոր: Դիտեք լուսանկարը»: