Խաբված բնակիչները բողոքում են. խոստացված խաղահրապարակի փոխարեն բազմաբնակարան շենք է կառուցվում (տեսանյութեր և լուսանկարներ)

Տերյան փողոցին հարող Տերյան 1, Տերյան 3, Տերյան 3ա, Տերյան 4, Արամի 48, Կողբացի 28, Կողբացի 30 Կողբացի 32 շենքերի բնակիչները այսօր վաղ առավոտից բողոքի ակցիա են անցկացնում նշված շենքերով պարփակված փոքրիկ բակում ևս մեկ շենք կառուցելու դեմ:

Նրանք պահանջում են, որ առաջին հերթին՝ դադարեցվի շինարարությունը, երկրորդը՝ շինարարության պատասխանատուները ներողություն խնդրեն, որ իրենք նման ծավալի փոշի են ստիպված եղել շնչել, ինչն էլ, նրանց խոսքերով, արդեն որոշ բնակիչների մոտ առողջական խնդիրների պատճառ է դարձել, և երրորդը՝ երեխաների համար խաղահրապարակ կառուցեն տվյալ վայրում:

«Operativ.am»-ի հետ զրույցում բնակիչները վստահեցնում էին, որ իրենք մինչև օրս տեղյակ չեն, թե նշված հատվածում ով և ինչ շինություն է կառուցում:

«Այս շենքերում ապրում են ընդհանուր առմամբ 1000-ից ավելի մարդ: Մեզանից ոչ ոք տեղյակ չէ, թե ինչ շինարարություն է ընթանում, ո՛չ պաստառ կա փակցված, ո՛չ էլ ինչ-որ մեկը մեզ տեղեկացրել է: Այսինքն շուրջ 1000 մարդու անտեսում են, հիմարի տեղ են դնում»,- նշեց բնակիչներից Արմանը:

Նրանց խոսքերով՝ դիմել են քաղաքապետարան, սակայն ոչ մի պատասխան չեն ստացել:
«Այսօր ուզում ենք արդեն գրավոր կերպով մեր բողոքները ներկայացնել: Հարևաններն էլ պարբերաբար զանգել են բայց դեռևս մեզանից ոչ ոք ոչ մի հստակ պատասխան չի ստացել»,- ասաց հավաքվածներից մեկը և հավելեց. « Երեխաները խաղալու տեղ չունեն, իմ երեխան երբեք բակում չի խաղացել: Եթե անցած ամառ երեխաները դուրս էին գալիս բակ խաղում էին, հիմա ամբողջ օրը տանը համակարգչի առաջ կամ հեռախոսը ձեռքին նստած են»:

Շինղեկ Վահան Վարդանյանը մեր հարցին ի պատասխան նշեց, որ տարածքը գնել է «ԱԿՎԱ-ԼԵՆ ՇԻՆ» ՍՊԸ-ն և հին շինության ապամոնտաժման աշխատանքները արդեն ավարտել են, մոտ 3 օրից էլ կսկսեն նոր շենքի կառուցման աշխատանքները: Մեր այն հարցին, թե արդյո՞ք բնակիչների պահանջները արդարացի են, նա նշեց. « Մարդիկ ունեն արդարացի պահանջներ, և մենք տարածքը համապատասխան ձևով կփակենք անվտանգության տեսանկյունից»: Մեր այն նկատառումը, որ բնակիչների գլխավոր պահանջը ոչ թե անվտանգության ապահովումն է այլ շինարարության դադարեցումը, պարոն Վարդանյանի կողմից մնաց անպատասխան:

Շինհրապարակ եկած տարածքի տերը, ով ներկայացավ Վարդան անունով, նշեց, որ շենքը գնել է քաղաքապետարանի կողմից վաճառքի հանվելուց հետո և խնդրեց բնակիչներին իրենց հարցերը ուղղել քաղաքապետարանին: