Նոր կյանքի «ընդդիմադիր» գյուղապետի հետքերով

Մեր օրերում ամեն ինչ հնարավոր է. կարելի է մի քանի ամբախ-զամբախ հայտարարություն անել, և դու ակտիվիստ կամ ընդդիմադիր ես։ Հետո հնարավոր է, որ մեկը քեզ նկատի և իր կուսակցության շարքերում տեղ տա։ Երկրի ապագայով խիստ մտահոգված ընդդիմադիրներն ու ամենագետներն ամենուր են։ Նրանց վեհ գաղափարախոսության ու սկզբունքայնության միֆը ցնդում է, երբ պաշտոն են ստանում։

Այդպես եղավ Արարատի մարզի Նոր կյանքի համայնքապետի ընտրություններից հետո, երբ գյուղապետ ընտրվեց ՔՊ կուսակցության անդամ Գարիկ Սարգսյանը։ Նախընտրական քարոզարշավի օրերին նա, ընկերների հետ տուն առ տուն մտնելով, սկսեց անիրականալի խոստումներ տալ, ոմանց՝ աշխատանք, մյուսներին՝ նյութական աջակցություն։ Նիկոլ Փաշինյանի սանը հավանաբար ընտրակաշառքի նոր մշակույթ էր ցանկանում ձևավորել՝ հետվճարային կամ հետընտրական։

Թերևս ընտրախախտումներից ու ընտրակաշառքից ամենաշատը խոսում են հենց այս ընդդիմադիրները։ Նա և իր ընկերները իրենց հրամանատար հռչակած Փաշինյանից մի քանի բառ են սովորել՝ կերան, թալանեցին, կեղծեցին և չեն գիտակցում, թե դրանք որտեղ պետք է օգտագործել։ Եվ միայն իրենց բնորոշ ձևերով՝ ամպագոռգոռ ճառերով, պոպուլիստական և դեմագոգիական կոչերով հրաշալի բեմադրություն հեղինակեցին։

Պարզունակ ծրագիր էր. պիտի քարկոծեին ու հրահրեին համայնքի ղեկավարին՝ մեղադրելով վատ աշխատանքի, կոռուպցիոն խարդավանքների մեջ։ Ինչևէ, ընդունակ կուսակցականն ու իր աջակիցները, շատերին ապակողմնորոշելով, կարողացան անհրաժեշտ ձայներն ապահովել, և այդտեղից սկսվեց քաոսը։

Այս ընթացքում ի՞նչ ասաց և արեց Գարիկ Սարգսյանը.

. Իբր նախկին գյուղապետը աշխատանք է տվել իր բարեկամներին, և գործի տեղավորեց իր մտերիմներին ու ընկերներին։

. Առանց հիմքի մանկապարտեզի տնօրենին մեղադրեց չարաշահումների, աշխատանքի թերացման ու վատ ղեկավարման մեջ՝ ԱԺ ընտրություններից առաջ ազատելով աշխատանքից։ Արդյունքում խայտառակ եղավ, երբ խոշորացույցով փորփրելուց հետո չկարողացավ գոնե մի բիծ և չարաշահում գտնել։ Նոր տնօրեն նշանակեց իր ընկերոջ կնոջը, ով ՀՀԿ անդամ է, այստեղ՝ վարագույր։ Իսկ Գ. Սարգսյանի տված այն խոստումը, թե մանկապարտեզի ոչ մի աշխատակցի աշխատանքից հեռացում չի սպառնում, գրվեց սառույցին:

. Փողոցների արտաքին լուսավորության հարցը լուծեց նախկին գյուղապետի թողած բյուջեի միջոցների հաշվին (15-16 մլն դրամ եղել է), այսինքն՝ ով էլ լիներ համայնքի ղեկավար, առաջիկայում պիտի այդ ծրագիրն իրագործեր։

. Նախընտրական քարոզարշավի ժամանակ բարձրաձայնեց, թե բյուջեն մսխվում է, «ատկատներ» են արվում, սակայն իր կողմից հաստատված բյուջեի ծախսերը էականորեն չփոխվեցին։

. Հայտարարեց, թե ներքին աուդիտ է իրականացնելու և, անկախ աուդիտորական ընկերություն հրավիրելու փոխարեն (Այդ դեպքում կփաստեր գյուղապետի և մանկապարտեզի տնօրենի աշխատանքային մաքուր գործունեությունը և չէր կարող «կերան», «թալանեցին» լոզունգներն օգտագործել), իբր տվյալները էլեկտրոնային կրիչի վրա տեղադրելու նպատակով, բյուջեից տրամադրելով մոտ մեկ միլիոն դրամ՝ պայմանագիր կնքեց ինչ-որ նորաստեղծ կազմակերպության հետ, որը հաշվապահական հաշվառման ծառայություններ է մատուցել (Ինչ-որ ատկատի հոտ է փչում)։

. Կազմակերպեց միջոցառում՝ գյուղի հիմնադրման 70-ամյակը, որն ավելի շատ անկազմակերպ մանկական հանդեսի վերածվեց։ Թերևս նրա աշխատելաոճն էլ մանկական ձեռագիր է հիշեցնում՝ աշխատելու փոխարեն սոցիալական ցանցերում պարբերաբար տեղադրելով այս կամ այն գործիչների վերաբերյալ քննադատական նյութեր և ծաղրանք։ Լավ կլիներ, եթե փորձեր նաև իրեն կողքից նայել, գո՞ւցե իր գործունեությունն էլ իր կողմից որոշակի գնահատականի ու մեկնաբանության արժանանար։

. Հեծանիվով աշխատանքի գնալու ցանկություն հայտնեց, որն այդպես էլ ցանկություն մնաց։

. Ծառայողական մեքենան աճուրդին չվաճառվեց, ուստի արդեն գյուղի համար շքեղություն չէր, տեղակալի հետ կարելի էր հանգիստ վարել:

. Ամեն մի չնչին առիթն օգտագործեց իրեն գովազդելու համար, անընդհատ ոչինչ չասող հարցազրույցներ էր տալիս ԵԼՔ-ի բարեկամ լրատվամիջոցներին։ Աշխատանքային 8 ամիսների ընթացքում 800 անգամ գովերգեց իր անձը։

. Տարեվերջին գազաֆիկացված երկու փողոցի մասին հայտնեց՝ նախկին գյուղապետի կատարած աշխատանքները վերագրելով իրեն։

. Գյուղի բարերարների կողմից ուսանողներին տրամադրեց անվճար հիմունքներով գործող միկրոավտոբուս։ Սակայն իրականում սա անարդյունավետ որոշում էր, քանի որ գյուղը տրանսպորտի խնդիր չուներ։ Բացի այդ՝ վառելիքի ծախսն ու վարորդի աշխատավարձի հարցը հոգում է գյուղապետարանը, իսկ երթուղայինից օգտվում են ոչ բոլոր ուսանողները՝ դասաժամերը չհամընկնելու պատճառով։ Նախկին գյուղապետը երթուղային մեքենա տրամադրելու փորձ ևս արել էր, բայց ծախսերը չէին արդարացվել։ Ընդհանրապես նա աշխատելու կեղծ իմիտացիա ստեղծեց՝ գյուղացիների աչքերին թոզ փչելու համար։

Ինչո՞ւ այսպես ստացվեց Գարիկ Սարգսյանի աշխատանքը համայնքի ղեկավարի պաշտոնում.

. Նա գյուղացիների նկատմամբ ազնիվ չէր, եկել էր քինախնդրությամբ, փորձում էր հաշվեհարդար տեսնել նախկին գյուղապետի բարեկամների ու աջակիցների հետ՝ գյուղը երկու մասի բաժանելով, պառակտում ու թշնամանք մտցնելով։

. Սխալ աշխատանքային սկիզբ։ Գյուղապետարանի և մանկապարտեզի աշխատակիցների նկատմամբ դրսևորում էր նվաստացնող վերաբերմունք, մեծամտություն՝ չգնալով որևէ փոխզիջման։

. Նրան ուղղորդում էին Ռուսաստանում բիզնես ունեցող մի քանի մարդիկ, որոնց պատվերները նախկին գյուղապետը չէր կատարում, ինչի պատճառով լարվել էին նրանց հարաբերությունները։ Իսկ Գ. Սարգսյանը իդեալական գործիք և կամակատար էր ինչպես նրանց, այնպես էլ կուսակցականների ձեռքում։ Եւ երբևէ չաշխատած այս անձն առանց ամոթի հայտարարեց, թե նախկին գյուղապետն ու մանկապարտեզի տնօրենը տարիների ընթացքում ոչինչ չեն արել, ովքեր իրենց աշխատանքները դրոշակ չեն դարձրել, չեն ցանկացել ինքնագովազդով զբաղվել, ստեղծել են, ոչ թե քանդել, բյուջեն քամուն չեն տվել։

Գուցե շատերը չհավատան, փնտրեն այլ պատճառներ, թե ինչու այսպես ստացվեց Գարիկ Սարգսյանի պաշտոնավարումը, սակայն մի բան պարզ է. հնարավոր չէ ստախոսությամբ, սադրանքով, շանտաժով ու փուչ խոստումներով երկար աշխատել, ժամանակի ընթացքում ամեն ինչ կբացահայտվի։ Եվ եթե նա պատասխանատվության ենթարկվի մի մի քանի մարդկանց զրպարտելու և համայնքի բյուջեն վատնելու համար, ի՞նչ են ասելու՝ ընդդիմադիր էր, դրա՞ համար գլխին սարքեցին ու չթողեցին, որ աշխատեր:

Այսքանից հետո, եթե հարցեր մնացին, ապա միասին վայելենք նրա նախընտրական քարոզարշավը:

Մարինե Ամիրյան. Ֆեյսբուք: