Զարմանում եմ Արա Բաբլոյանի զարմանքի վրա

Արցախի հանրապետությունում գտնվող ԱԺ նախագահ Արա Բաբլոյանը իր «facebook»-յան էջում գրառում է կատարել՝ կապված երեկ Արցախի և Ադրբեջանի սահմանին զոհված երեք զինծառայողների փաստի առնչությամբ, ցավակցել է զոհվածների հարազատներին և ընկերներին: Գրառման մեջ ԱԺ նախագահը անկեղծորեն իր զարմանք է հայտնում, որ «դեռևս չկա որևէ արձագանք միջազգային գործընկերներից»:

«Ակտիվ» քաղաքականության մեջ առաջին քայլերը կատարող Արա Բաբլոյանը բացարձակ տեղյակ չէ արդի միջազգային հարաբերություններում տիրող «գիշատչային հարաբերություններին» և խաբնվում է մեր «գործընկերների» կոստյումներին և փողկապներին: Պարոն Բաբլոյանը պետք է գիտենա, որ աշխարհը չի փոխվել և բոլորը հարգում են ՈՒԺԵՂՆԵՐԻՆ: Նույնիսկ մեր «գործընկերները»: Ոչ ոք չի հարգում լացկաններին, բողոքողներին և ուրիշների «փեշերից կախ ընկնողներին», որոնք տարրական զզվեցնում են իրենց պահվածքով: Այնպես որ, պարոն Բաբլոյան, պետք չէ զարմանալ: Աշխարհում և հատկապես միջազգային հարաբերություններում գործում է՝ «Ուժեղի մոտ միշտ էլ թույլն է մեղավոր» բանաձևը: Պետք է ակտիվ գործել և չսպասել որևէ մեկի արձագանքին: Իսկ բացասական արձագանքի դեպքում՝ տարրական անտեսել այն, ինչպես անում են որոշ ՈՒԺԵՂ երկրներ,որոնց համար իրենց ազգային շահերը վեր են ամեն ինչից:

Հետաքրքիր է նաև պարոն Բաբլոյանից իմանալ, թե ո՞ր գործընկերներից է վերջինս արձագանք սպասում: Չլինի, Մինսկի խմբի համանխագահներից, որոնք ծպտուն չհանեցին, երբ անցյալ տարի ապրիլի սկզբին Ադրբեջանը լայնամասշտաբ հարձակման անցավ Արցախի դեմ, թե Ռուսաստանի՞, որը վերջին տարիներին 5-6 միլիարդ դոլարի զենք է վաճառել Բաքվին և մեր բողոքներին ի պատասխան հայտարարում է, որ դա ընդամենը բիզնես գործարք է: ԱՄՆ-ից էինք սպասում արձագանքի՞, որը ճիշտ է, զենք և զինամթերք չի վաճառում Իլհամ Ալիևին,բայց ահռելի մեծ ներդրումներ ունի Ադրբեջանի նավթագազային ոլորտում և անտեսելով Ադրբեջանի սանձարձակություններն ակամայից պաշտպանում է վերջինսի: Ուրիշ էլ ումի՞ց էինք արձագանքի սպասում: Չլինի ադրբեջանաթուրքական գերության մեջ ընկած Վրաստանից:

Զարմանում եմ, որ Արա Բաբլոյանը զարմացել է մեր այսպես կոչված միջազգային գործընկերների արձագանքից, այսինքն՝ «չարձագանքից»: Այդպես էլ պետք է լիներ, պարոն Բաբլոյան: Պետք է գործել և զարմացնել այդ գործընկերներին ու երբեք չսպասել որևէ արձագանքի որևէ մեկից:

Գագիկ Համբարյան. Ֆեյսբուք: