«Ադրբեջանի երկաթուղիները» սնա՞նկ են

«Reuters» գործակալությունը հետաքրքիր տեղեկություն է հրապարակել, որը ևս մեկ անգամ ապացուցում է, որ ապշերոնյան սուլթանի վիճակը գնալով վատթարանում է: «Ադրբեջանի երկաթուղիներ» ՓԲԸ-ն հայտարարություն է տարածել, ըստ որի՝ փնտրում է ֆինանսական հարցերով միջազգային խորհրդատուի: Ըստ բրիտանական գործակալության՝ այդ խորհրդատուի հիմնական գործառույթը «Ադրբեջանի երկաթուղիներ» ՓԲԸ-ի պարտքերի վերաֆինանսավորման մեխանիզմների փնտրտուքն է լինելու: Սա նշանակում է, որ «Ադրբեջանի երկաթուղիները» ծայրահեղ ծանր ֆինանսական վիճակում են, և չի բացառվում, որ կարող է սնանկ ճանաչվի:

Հիշեցնեմ, որ ընդամենը մեկ ամիս առաջ պաշտոնապես սնանկ է ճանաչվել նաև Ադրբեջանի Միջազգային Բանկը, որի կուտակած պարտքերը կազմում են 3 միլիարդ ամերիկյան դոլար: Բանկի պարտքերի պատճառով բավական սրվել են Ադրբեջանի կառավարության հարաբերությունները խոշոր եվրոպացի ներդրողների, ինչպես նաև Ղազախստանի հետ, որի իշխանությունները ժամանակին Ղազախստանի կեսնաթոշակային հիմնադրամի կուտակած 250 միլիոն դոլլարը ներդրել էին ԱՄԲ-ում, իսկ հիմա կանգնած են դրանք հետ չստանալու վտանգի առաջ:

«Reuters»-ը նաև հիշեցնում է, որ օտարերկրյա ներդրողներին ահռելի պարտքեր ունեն կուտակած նաև ադրբեջանական պետական այնպիսի խոշոր ձեռնարկություններ, ինչպիսիք են «SOCAR»-ը, «Azerenerji»-ին և «AZAL»-ը:

Միջազգային շուկայում նավթի գների անկման պատճառով ապշերոնյան սուլթանի գործերը օրեցօր վատանում են: Նավթային կախվածության մեջ գտնվող Ադրբեջանի տնտեսությունը «լոմկայի» մեջ է հայտնվել նավթադոլարների պակասից, որի հետևանքները կարող են ծայրահեղ ծանր լինել: Իլհամ Ալիևի նման բռնապետն ամեն ինչ կանի, որ պահպանի իշխանությունը: Դրա համար անհրաժեշտ է հասարակության ուշադրությունը շեղել երկրի ներքին խնդիրներից: Այդ հանգամանքը հաշվի առնելով Հայաստանը և Արցախը պետք է պատրաստ լինեն Ալիևի բոլոր տեսակ սադրանքներին:
ԱՄԲ-ի, իսկ հիմա արդեն «Ադրբեջանի երկաթուղիների» սնանկությանը մեծ հարված է հասցնելու նաև Ադրբեջանի միջազգային վարկանիշին և հեռու է պահելու օտարերկրյա ներդրողներին Ադրբեջանից:

Գագիկ Համբարյան. Ֆեյսբուք: