Համաշխարհային բանկը Հայաստանում տնտեսական աճ է կանխատեսել

Համաշխարհային բանկի «Համաշխարհային տնտեսության հեռանկարները 2017 թվականին» զեկույցի համաձայն, ընթացիկ տարում Հայաստանում սպասվում է 2,7 տոկոսանոց տնտեսական աճ: Այս մասին հայտնում է «Ամերիկայի ձայնը»՝ հավելելով, որ Զեկույցի կանխատեսմամբ հաջորդ տարի տնտեսական աճը Հայաստանում կկազմի 3,1 տոկոս:

Ըստ Համաշխարհային բանկի կանխատեսումների՝ Հարավային Կովկասի տարածաշրջանը այս տարի կգրանցի ընդհանուր 0,1 տոկոսի աճ: 2018 թվականին տարածաշրջանում սպասվում է 1,6 տոկոսի աճ: Հայաստանի հարևան երկրներից Ադրբեջանում է միայն այս տարի կանխատեսվում ՀՆԱ-ի 1,4 տոկոս անկում, իսկ 2018 թվականին այդ երկրում կգրանցվի 0,6 տոկոսի աճ: Ըստ զեկույցի՝ Հարավային Կովկասի տնտեսական աճի առաջատարն է Վրաստանը, որի տնտեսությւոնը 2017-ին կաճի 3,5 տոկոսով, իսկ 2018-ին կգրանցի 4,0 տոկոսի աճ:

Համաշխարհային բանկի տվյալներով այս տարվա առաջին կեսին Եվրոպայի ու Կենտրոնական Ասիայի տարածաշրջանը շարունակում է գրանցել դրական միտումներ տնտեսական աճի առումով: Ընդհանուր առմամբ աճ է գրանցվել ինչպես արտահանող, այնպես էլ՝ հումք ներմուծող երկրների շրջանակում:

Դրան նպաստել են մի շարք գործոններ ներառյալ նավթի գների բարձրացումը, համաշխարհային ֆինանսական շուկայի կայունությունը, եվրոգոտու կայուն տնտեսական աճը, ինչպես նաև խոշոր երկրների վարած քաղաքականությունը:

Հայաստանի տնտեսական զարգացման հարցում կարևոր դեր ունի տնտեսական իրավիճակը Ռուսաստանում: Ըստ Համաշխարհային բանկի կանխատեսումների, երկու տարի անընդմեջ տնտեսական անկում գրանցած Ռուսաստանն այս տարի կգրանցի 1,3 տոկոսի աճ, իսկ հաջորդ երկու տարիներին աճը կկազմի 1,4 տոկոս: Տնտեսության վերականգնումը Ռուսաստանում իր դրական ազդեցությունը կթողի Հայաստանի տնտեսության վրա:

Համաշխարհային բանկի կանխատեսմամբ մյուս խոշոր երկրներից Թուրքիան այս տարի կգրանցի 3,5, իսկ 2018 թվականին՝ 3,9 տոկոսի աճ: