Սերժ Սարգսյանի խոսքը ՀՀ Նախագահի մրցանակների հանձնման արարողության ժամանակ

Այսօր՝ մայիսի 26-ին, Նախագահի նստավայրում տեղի է ունեցել Հայաստանի Հանրապետության Նախագահի 2016 թվականի մրցանակների հանձնման արարողությունը, որի ժամանակ Սերժ Սարգսյանի հնչեցրած խոսքը ներկայացնում ենք ստորև.

Հարգելի՛ տիկնայք և պարոնայք,

Սիրելի՛ մրցանակակիրներ,

Սրտանց ողջունում եմ ձեզ և շնորհավորում Հայաստանի Հանրապետության Նախագահի մրցանակին արժանանալու կապակցությամբ: Շատ ուրախ եմ, որ այսօր հանդիպում ենք և շփվում նման հաճելի առիթով՝ պատշաճ գնահատելով ձեր վաստակը:

Այդ գործում արդեն տարիներ շարունակ մեզ սատարել են Պողոսյան ընտանիքի հարգարժան անդամները: Օգտվելով առիթից՝ ելույթիս հենց սկզբում ցանկանում եմ բոլորիս անունից մեկ անգամ ևս երախտագիտություն հայտնել նրանց այս կարևորագույն աշխատանքը համատեղ կատարելու համար:

Սիրելի՛ Ժան, արդեն տարիներ շարունակ մենք միասին բացահայտում ենք մեր երկրի և ժողովրդի ստեղծագործական ներուժը, խրախուսում ենք մեր գիտնականներին և արվեստագետներին՝ շարունակելու իրենց նվիրական աշխատանքը: Սա լուրջ ներդրում է Հայաստանի շենացման գործում, և, անշուշտ, մեծապես գնահատում ենք:

Սիրելի՛ բարեկամներ,

Ըստ ավանդույթի, մեր ժողովրդի ստեղծագործական մտքի և թռիչքի ամենակարևոր ձեռքբերումներից մեկը՝ հայոց այբուբենը, Սուրբ Մեսրոպ Մաշտոցին երևացել է տեսիլքի ձևով: Պատմաբաններն ասում են, որ շատ գիտական հայտնագործություններ պատահականության, անգամ երազի արդյունքում են կատարվել:

Նման պնդումները կարող են հիմքեր ունենալ, սակայն ճշմարտությունն արտացոլում են միայն մասամբ: Այո՛, պայծառացումը կարող է տեղի ունենալ վայրկենապես՝ անգամ ենթագիտակցության մեջ: Սակայն նման, այսպես ասած, «պատահականությունները» տեղի են ունենում միայն այն մարդկանց հետ, ովքեր տարիներ շարունակ հող են պատրաստել դրա համար:

Ստեղծագործական աշխատանքը պահանջում է տարիների սևեռուն և հետևողական նպատակադրում: Տեղեկատվության, գիտելիքի, հմտության և փորձի համադրումը երբեք չի կարող անհետևանք լինել: Դրանք են այն ամուր հիմքերը, որ բերում են ստեղծագործական թռիչքի: Ամեն մի վայրկենական պայծառացման պատմության թիկունքում թաքնված է երկար տարիների տքնաջան աշխատանք:

Վստահ եմ, որ այս պարգևին արժանացած յուրաքանչյուր ոք ունի իր երկարամյա ջանքերի, ճշմարտության փնտրտուքների, սխալների հայտնաբերման և շտկման մի յուրահատուկ պատմություն:

Այս պարգևատրումը առաջին հերթին երիտասարդների համար թող լինի հաջողության պատմության առաջին էջը, որպեսզի նոր պարգևները և միջազգային ճանաչումը չուշանան:

Հարգելի՛ դափնեկիրներ,

Խոսքս ամփոփելով՝ կրկին շնորհավորում եմ ձեզ և մաղթում ստեղծագործական մեծ եռանդ և նորանոր ձեռքբերումներ՝ ի փառս մեր ժողովրդի, ի շահ մարդկության:

Շնորհակալություն: