Ելքի խորհրդարանական հյուրախաղերը

Նոր ձևավորված խորհրդարանի աշխատանքներն արդեն իրենց հետ մի շարք հարցեր են առաջ բերում: Ազգային ժողովի վեցերորդ գումարման առաջին նիստին «Ելք» դաշինքը քաղաքական որոշում էր կայացրել բոյկոտել նախագահի ելույթը:

«Ելք» դաշինքի պատգամավոր Մանե Թանդիլյանը լրագրողների հետ զրույցում ասել էր, որ իրենց որոշումը պայմանավորված է խորհրդարանական և Երևանի ավագանու ընտրություններում լայնորեն կիրառված ընտրակաշառքի և վարչական ռեսուրսի օգտագործման հանգամանքով:

Սոցիալական ցանցերում կարծիքներ էին հնչում, թե ելույթը բոյկոտելը իմաստ չունի, քանի որ դաշինքի անդամները այնուամենայնիվ նիստից հետո լսելու են նախագահի ելույթը: Այս կարծիքը հերքվում էր դաշիքնի ակտիվի կողմից:

Երեկ տեղի ունեցած ԱԺ հերթական նիստի ժամանակ դաշինքի անդամ Արամ Սարգսյանը հանդես եկավ ելույթով, որի ժամանակ նշեց. «Բա ասում էիք, որ սա նոր խորհրդարան է, նոր հիմքեր ու տրադիցիաներ պետք է դնենք, որ ախպոր պես պետք է աշխատենք, այ ՀՀԿ ախպեր ջան, ձեր նախագահն էլ էր էտ ասում, որ փոքրամասնության կարծիքը լսել է պետք»:

Մի հարց է առաջ գալիս: Եթե «Ելք» դաշինքի անդամները պնդում էին, որ իրենք ամբողջությամբ բոյկոտում են նախագահի ելույթն ու անգամ նիստից հետո չեն պատրաստվում դա լսել, ապա ինչպե՞ս է լինում, որ Արամ Սարգսյանը բավականին մանրակրկիտ ձևով տիրապետում է Սերժ Սարգսյանի հնչեցրած մտքերին:

Սա երկակի ստանդարտներ են, թե՞ պարզապես «Ելք»-ը նախընտրական շոուն տեղափոխել է խորհրդարանի դահլիճ: Հարցը նրանում է, որ խոսք-գործ տրամաբանական շղթան այստեղ կտրված է: Մնում է միայն հասկանալ, թե բոյկոտի որոշումը ի՞նչ խնդիր էր փորձում լուծել՝ զուտ կոսմետիկ, թե՞ գաղափարական:

Հայկ Դերզյան. Ֆեյսբուք: