Ինչ ընտրախախտումներ են տեղի ունեցել ժամը 14:00-ից 16:00-ի դրությամբ (տեսանյութեր)
Երևանի ավագանու ընտրությունների անցկացման ընթացքում «Իրավունքի Եվրոպա միավորում» ՀԿ-ն «Քաղաքացի դիտորդ» նախաձեռնության շրջանակներում ընտրախախտումներ է արձանագրել, որոնք ներկայացնում ենք ստորև.
ՀՀԿ-ական թաղապետը՝ ընտրատեղամասում
Թիվ 10/53 տեղամասում «Իրավունքի Եվրոպա միավորում» ՀԿ-ի դիտորդն արձանագրել է, որ քաղաքացին մուտք է գործել ընտրատեղամաս, մոտեցել հանձնաժողովի անդամներին, զրուցել վերջիններիս և ներկա գտնվողների հետ (վերջինս չի հանդիսացել տվյալ տեղամասի ընտրող)։ Դիտորդը փորձել է հանձնաժողովի անդամներից ճշտել, թե ով է հանդիսանում նշված անձը, որին ի պատասխան դիտորդին հայտնել են, որ ինքը կարող է մոտենալ այդ անձին և ինքը ճշտել, թե ով է հանդիսանում տվյալ անձնավորությունը։ Դիտորդը մոտեցել է տվյալ անձնավորությանը և պարզել, որ վերջինս հանդիսանում է Հայաստանի Հանրապետական կուսակցության կողմից առաջադրված ավագանու թեկնածու, Երևան քաղաքի Նուբարաշեն վարչական շրջանի ղեկավար Արթուր Կիրակոսյանը։
Դիտորդի պահանջով վերոնշյալ փաստն արձանագրվել է տեղամասային ընտրական հանձնաժողովի կողմից։
Դիտորդին արգելում են տեսանկարահանել գրանցամատյանը
Թիվ 7/43 տեղամասում հանձնաժողովի անդամներն արգելում են «Իրավունքի Եվրոպա միավորում» ՀԿ-ի դիտորդին տեսանկարահանել գրանցամատյանը:
Ընտրողը նկարել է քվեաթերթիկը
Թիվ 7/29 տեղամասում «Իրավունքի Եվրոպա միավորում» ՀԿ-ի դիտորդն արձանագրել է, որ ժամը 14:35-ի սահմաններում ընտրողը նկարել է քվեաթերթիկը: Վերջինիս նոր ծրար և քվեաթերթիկներ են տրամադրվել: Դեպքը գրանցվել է գրանցամատյանում:
Տղամարդն առանց որևէ կարգավիճակի առավոտյան 7:45-ից գտնվել է ընտրատեղամասում
Այս անձը առավոտյան 7:45-ից գտնվել է թիվ 2/12 տեղամասում՝ չունենալով որևէ կարգավիճակ: Նա անդադար զանգեր է կատարում, մարդկանց է դիմավորում և առանց որևէ արգելիք շրջում է տեղամասի տարածքում:
Կարուսելի փորձ
Թիվ 7/43 տեղամասում «Իրավունքի Եվրոպա միավորում» ՀԿ-ի դիտորդն արձանագրել է, որ քվեարկող տարեց կինը մոտեցել է քվեատուփի մոտ՝ դրա մեջ ծրարը նետելու նպատակով: Նրա մոտ բացի քվերկության ծրարում առկա քվեաթերթիկից եղել է նաև երկրորդ քվեաթերթիկ, որը նա փորձել է դուրս հանել տեղամասային կենտրոնից: Քվեարկության ծրարում առկա քվեաթերթիկը եղել է Տարոն Մարգարյանի օգտին:
Դիտորդը պահանջել է գրանցել խախտումը/խախտման վերաբերյալ իր գնահատականը տեղամասային ընտրական հանձնաժողովի գրանցամատյանում: Հանձնաժողովի նախագահը փորձել է համոզել, որ այս անգամ չարձանագրեն, քանզի սխալմունք է տեղի ունեցել, և քվեարկողին ավելորդ քվեաթերթիկ է տրամադրվել: Հորդորել է արձանագրել որպես խախտում, եթե երկրորդ անգամ նման բան կրկնվի:
Դիտորդի բազմակի պնդումներից հետո խախտումը գրանցվել է գրանցամատյանում: Դրան ի պատասխան, հանձնաժողովի նախագահը և քարտուղարը փորձել են կազմել մեկ այլ արձանագրություն: Հանձնաժողովի քարտուղարը դուրս է եկել քվեարկության սենյակից:
Վերադարձել է գրված արձանագրությամբ, որում նշված է, որ երկրորդ քվեաթերթիկը տրամադրվել է ընտրողին հանձնաժողովի անդամի կողմից պատահաբար: