Ինչ ընտրախախտումներ են արձանագրվել 11:00-ի դրությամբ

Այսօր «Իրավունքի Եվրոպա միավորում» ՀԿ-ն «Քաղաքացի դիտորդ» նախաձեռնության շրջանակներում ժամը 11:00-ի դրությամբ ընտրախախտումներ է արձանագրել, որոնք ներկայացնում ենք ստորև.

1/2 07:30:00 Կուտակումներ տեղամասի մոտ

Վարդգես Գասպարին գտնվել է 9/23 տեղամասում որպես դիտորդ: Վերջինիս կողմից դիտարկված խախտումները հետևյալն են. տեղամասի դիմաց ժամը 7:30-ից մոտ մեկ, մեկուկես ժամ կայանած է եղել ավտոմեքենա: Հանձնաժողովի նախագահը մոտեցել է վարորդին խնդրելու համար, որ հեռացնի մեքենան, բայց վերջինս չի հեռացրել մեքենան: Վարդգես Գասպարին 14.05.2017թ. գտնվել է տեղամասի դիմաց ժամը 08:15-ի սահմաններում, մոտ 5-6 մետր հեռավորության վրա հավաքված են եղել անհայտ անձինք: Հանձնաժողովի նախագահը տեղեկացված է խախտման մասին, սակայն որևէ գործողություն չի ձեռնարկել: Դիտորդի մոտենալուց խումբը ցրվել է:

9/23 տեղամասում տեխնիկական սարքի մասնագետը, հարվածել է «Իրավունքի Եվրոպա միավորում» ՀԿ-ի դիտորդին

Թիվ 9/23 ընտրատեղամասում տեխնիկական սարքի մասնագետը հարվածել է «Իրավունքի Եվրոպա միավորում» ՀԿ-ի դիտորդին, օբյեկտիվը հեռացրել է իր ուղղությունից՝ այդպիսով խոչընդոտելով դիտորդի նկարահանմանը: Հանձնաժողովի նախագահը որևէ գործողություն չի ձեռնարկել խախտումը դադարեցնելու համար:

7/37 ընտրատեղամասում քվեախցիկի հետևի դուռը բացվել է:

9/23 Հանձնաժողովի անդամը հայհոյել է դիտորդին:

Թիվ 9/23 ընտրատեղամասի հանձնաժողովի անդամ Արթուր Շիրինյանը հայհոյել է «Իրավունքի Եվրոպա միավորում» ՀԿ-ի դիտորդ Վարդգես Գասպարիին՝ ասելով «սիկտիր»: Երբ գրանցամատյանում գրանցվում էր դիտորդի գնահատականը հանձնաժողովի անդամի կողմից իրեն հայհոյելու կապակցությամբ, տեղամասում վստահված անձ գրանցված անձը՝ Կուղյանոսյան ազգանունով, հանձնաժողովի քարտուղարին ասել է, որ դիտորդը հայ չէ, պարսիկ է՝ ակնհայտ նպատակ ունենալով նսեմացնել դիտորդի անձը: Հանձնաժողովի նախագահը որևէ գործողություն չի ձեռնարկել: