Թե ինչպես Արամ MP3-ն քաղմաս ներկայացավ բռնաբարության մեղադրանքով

Operativ.am-ի բլից հարցերին պատասխանում է սիրված հումորիստ, Վիտամին ակումբի անդամ Արամ MP3-ն:

-Մանկական կատակ՝ ոչ մանկական հետևանքներով:

-Ապրիլմեկյան կատակ եմ արել, ծնողներիս խաբել եմ իբր  փոքր եղբորս հետ դեպք է պատահել. ավտովթարի է ենթարկվել:

Դա ապրիլմեկյան մանկական կատակ էր՝ ոչ մանկական հետևանքներով:

-Ի՞նչ նվիրական երազանքներ եք ունեցել մանկության տարիներին:

-Երգել բեմում, ունենալ յոթ երեխա և ապրել օվկիանոսի ափին:

-Ունեցե՞լ եք հերոսի կերպար, եթե այո՝ ո՞վ է եղել:

-Ինձ համար հերոսի կերպար է եղել Բարոն Մյունխաուզենը. ես միշտ ուզեցել եմ իրեն նմանվել՝ հաշվի չառնելով Նյուտոնի բոլոր օրենքները ցանկացել եմ ձեռքով ինքս ինձ բարձրացնել:

-Ինչպե՞ս գտաք Ձեր սիրուն կամ ինչպե՞ս Ձեր սերը գտավ Ձեզ:

-Երևի թե ես գտա. թակեցի նրա տան դուռը, ինքը բացեց, այդ ժամանակ իրար չէինք ճանաչում ու դուռը բացեց, և  ես գտա իմ սիրուն:

Մենք պարզապես ընդհանուր ընկեր ունեինք և այդ ընկերոջ հետ գնացել էինք ապագա կնոջս տուն.  ընդամենը դուռ եմ ծեծել ու գտել եմ իմ սիրուն, տենց մի օր էլ կարող է դուռը թակեմ, ֆեռարի լինի ու իմը դառնա:

-Ամենամեծ անակնկալը, որ մատուցել եք Ձեր սիրուն ու Ձեզ մատուցված ամենամեծ անակնկալը:

-Մեր հարսանիքի ժամանակ անակնկալ կերպով երգ մատուցեցի կնոջս և մի անգամ էլ է նման դեպք եղել. Իմ համերգներից մեկի ժամանակ  Սուրբ Վալենտինի օրը ես որոշեցի երգել You are so beautiful երգը՝ իմանալով, որ կինս նստած է ամենավերջին շարքում:

Երգեցի. մարդիկ հուզվեցին, զույգեր կային, որոնք համբուրվեցին. դահլիճում տիրում էր դրական էմոցիա: Ջգվեցի դեպի դահլիճի վերջը և գոռացի՝ ես քեզ սիրում եմ: Սակայն լսվեց միայն բարձր ծիծաղի ձայներ և ուրիշ ոչինչ, ու ես հասկացա, որ կինս դեռևս չի հասել համերգին և ես մատով ցույց էի տալիս մի աղջկա, որն ինձ հետ  որևէ կապ չունի:

Կնոջս մատուցած ամենամեծ անակնկալն այն էր, որ ասեց հղի եմ.  մենք սպասում ենք բալիկի. դա ինձ համար աշխարհի ամենամեծ անակնկալներից էր:

-Ձեր կյանքի ամենամեծ խենթությունը:

-Ամենամեծ խենթությունս երևի թե այն էր, որ  գրազ եկա թե պարտվելու դեպքում պետք է ականջս ծակեմ և ականջող կախեմ. ինձ համար դա խենթություն էր, բայց ինչեր ասես չես անի հեռուստադիտողի համար, քանի որ դա հաղորդման շրջանակներում էր:

Կցանկանայիք փոխել Ձեր բնավորության...

-Դա շատ անձնական թեմա է, իհարկե բավականին կողմեր կան, որ կուզենաս փոխես, կարծում եմ՝ չկա այնպիսի մարդ, որը չուզենա իր մեջ բնավորության գոնե երեք կետը փոխի. ինձ մոտ էլ կան նման գծեր, փորձում եմ ցույց չտալ դրանք:

-Մարդկային խառնվածքի այն գիծը, որը սկզունքորեն տանել չեք կարողանում:

-Երկերեսանի մարդկանց չեմ սիրում:

-Ամենաանհաջող հումորը, որը երբևէ արել են Ձեզ հետ:

-Տարիներ առաջ  նամակ էր եկել մեր տուն, որի մեջ գրված էր, թե  ես պետք է մոտենամ մոտակա քաղմաս ու տվյալներս գրանցեմ, որովհետև ինձ կասկածում են բռնաբարության մեջ.  այդ ամենն այնքան ճիշտ էր գրված՝ օրենսգրքին համապատասխան,  որ ես ճիշտն ասած բավականին վախեցել էի:

Գնացի քաղմաս, ինձ ասեցին՝ տղա ջան, ինչու՞ ես եկել, ես իրենց տվեցի թուղթը, ծիծաղեցին...

շարունակությունը չպատմեմ:

-Երջանիկ է այն մարդը, ով...

-Գտել է իրեն այս կյանքում:

-Ինչի՞ց եք վախենում:

-Դոբեռմաններից:

-Ձեր թուլությունը:

-Վախը դոբեռմանների նկատմամբ:

-Արամ MP3 և Եվրատեսիլ. համատեղելի՞ է, թե՞ ոչ:

-Երևի թե միայն այն դեպքում, որ հասկանամ՝ կոնկրետ այս երգով կարելի է գնալ, սակայն ես այնքան էլ չեմ սիրում այդ մրցույթը, քանի որ այն այնքան էլ արդար չէ:

-Ամենանյարդայնացնող հարցը, որը երբևէ տվել են Ձեզ:

-Ինչու՞ Արամ MP3:

-Դուք՝ քսան տարի անց:

-Ես քսան տարի անց կլինեմ 49, իսկ ավելի կոնկրետ՝ 49 տարեկան 3 ամսական:

Հեղինակ՝ Սեդա Ղուկասյան