Ծառուկյանի ասածով դուրս չգալը դասալքություն է. Ազատ Արշակյան

Այսօր՝ մայիսի 4-ին, լրագրողների հետ զրույցում «Միացյալ Հայաստան» նախաձեռնության անդամ Ազատ Արշակյանը և քաղտեխնոլոգ Վիգեն Հակոբյանը խոսեցին «Ծառուկյան» դաշինքի ներսում ընթացող խմորումների մասին:

«Չի կարող Հայաստանում որևէ բան լինել առանց իշխանության իմացության, թե չէ ինչո՞ւ պիտի բավական ծանր պիտակ վերցնեին իրենց վրա: Իրենց դաշտում «ագավորկա» խախտելը համարվում է հանցագործություն, նրանք շատ լուրջ պատճառ են ունեցել, որպեսզի դուրս գան, իշխանության հաշվեհարդարից դուրս եկան»,-ընդգծեց Ազատ Արշակյանը և հավելեց. «Եթե Ծառուկյանի ասածով դուրս չեն գալիս, դա դասալքություն է, նրանք դուրս եկան, որպեսզի հաշվեհարդար չլինի իրենց հետ իշխանության կողմից»:

Բանախոսները նաև ընդգծեցին, որ «Ծառուկյան» դաշինքը պառակտելու սցենար կազմողները նկատել են, որ դաշինքը ինքնուրույնություն է ցուցաբերում, ինչն էլ թուլացնելու համար նման զարգացումներ եղան:

«Եթե սա զուտ տեխնիկական հարց է, մի մասը կարող է լեզու գտնել Ծառուկյանի հետ ու վերադառնալ կուսակցություն: Սովորաբար տեսել ենք, որ շատ ավելի լուրջ քաղաքական ու անձնական խնդիրներ են ջրվել, գնացել, բայց այս պահի դրությամբ ավելի հավանական է համարվում, որ մանդատ ստանալուց հետո կլքեն այդ խմբակցությունը և կլինեն անկախ պատգամավորի կարգավիճակում»,- ասաց Վիգեն Հակոբյանը, հավելելով, որ նոր Սահմանադրությամբ  նոր խմբակցություն ստեղծել չեն կարող, և փաստացի միակ ելքը մնում է անկախ պատգամավորի կարգավիճակով հանդես գալը:

«Իհարկե, սա մի քիչ ֆորմալ առումով է, ազատ պատգամավորներն ի վերջո նրանք են, ովքեր պիտի նեղացած լինեն Ծառուկյանից, ու իշխանության լրացուցիչ ռեսուրսը կարող են լինել»,- շեշտեց քաղտեխնոլոգը:

Ազատ Արշակյանի խոսքով՝ խորհրդարանական ընտրությունների ժամանակ դաշինքի անվանումն արդեն իսկ վարկանիշ էր ապահովում պատգամավորի թեկնածուների համար: 

«Շատերի համար հենց «Ծառուկյան» անվանումն է ձայներ ապահովել և ոչ թե հակառակը»,- նշեց բանախոսը՝ եզրափակելով, որ  «Ծառուկյան» դաշինքը շահագործվել է շնորհակալության փոխարեն»,- եզրափակեց Ազատ Արշակյանը: