Հայաստանից ուղարկված ցանկացած էպիկրիզ զրոյական է. Ապրիլյան պատերազմի մասնակից
Այսօր՝ մայիսի 3-ին, լրագրողների հետ հանդիպման ժամանակ Ապրիլյան պատերազմում հրազենային վնասվածք ստացած զինվորականներ Դանիել Դավթյանը և Հայկ Սեխլիյանը խոսեցին Քառօրյա պատերազմի հիշողությունների և բուժման ընթացքի մասին:
Դանիել Դավթյանը և Հայկ Սեխլիյանը ապրիլյան պատերազմի ընթացքում վիարվորվել են և այժմ գտնվում են վերականգնողական փուլում:
«Մնացել էր մեկ ամիս, որ զորացրվեի: Ծառայել եմ Մատաղիսում: «Spike» հակատանկային զինատեսակից եմ վիրավորվել, որի արդյունքում 2 բեկոր կա անմիջապես գլխուղեղիս վրա, մի քանիսն էլ մարմնիս այլ հատվածներում»,- ասաց Հայկ Սեխլիյանը, հավելելով. «Եթե Հայաստանում չստացվի բուժում իրականացնելը, ապա վիրահատությունը կիրականացնեն արտասահմանում»:
Դանիել Դավթյանը վիրավորվել է Թալիշում՝ ապրիլի 4-ին: Բժիշկները հույս չեն տվել, որ նա երբևէ կքայլի:
«Բժիշկները, փառք Աստծո, սխալվեցին, սակայն ես այժմ ունեմ արտերկրում վերջնական բուժման կարիք»,- նշեց Դավթյանը և հավելեց,- «Գերմանիա հարցում ենք ուղարկել, պատասխանել են, որ Հայաստանից ուղարկած ցանկացած էպիկրիզ զրոյական է, պետք է տեղում հետազոտվեն, բայց նաև վստահեցրել են, որ ամբողջական բուժումը հնարավոր է իրենց մոտ իրականացնել»:
Նրանք այժմ սպասում են արտերկիր մեկնելու համար կառավարության որոշմանը: Որը իրենց խոսքերով առանց պատճառաբանությունների անհիմն ձգձգվում է:
«Պետությունը մեզ շատ հարցերով է աջակցում, սակայն շատ հարցեր կան որ աչքաթող են արել: Օրինակ՝ ես ապրում եմ Աջափնյակ համայնքում, բայց բուժում եմ ստանում թիվ 1 հիվանդանոցում: Գնալ-գալու հետ կապված մեծ խնդիրներ են առաջանում: Պետությունից ես աջակցություն չեմ սպասում: Ամուսնացած եմ ունեմ 2 անչափահաս զավակ և վարձով եմ ապրում: Միակ խնդրանքս այն է, որ ժամանակին ուղարկեն բուժումների կամ սպասվելիք վիրահատությունը ժամանակին արվի»,- ասաց Դանիել Դավթյանը: