Հայաստանի միջազգային ոստիկանական ասոցիացիայի նախագահ Գրիշա Սարգսյանի շնորհավորական ուղերձը
Իմ շատ սիրելի հայրենակիցներ, իմ սիրելի զինակից ընկերներ, ընդամենը մի քանի ժամից պատմության գիրկը կուղարկենք 2016 թվականը, որը մեր ժողովրդի համար ծանր փորձություններով լի տարի էր: Առաջին հերթին ուզում եմ հիշատակել մեր թանկ կորուստները սահմանին, ապա այն հերոսական հակահարվածը, որ ցույց տվեցին անարգ թշնամուն մեր քաջազուն տղաները: Ես գլուխ եմ խոնարհում զոհվածների սուրբ հիշատակի առաջ, նրանց անուները ոսկե տառերով են գրվելու մեր պատմության հերոսական էջերում: Միլիցիայի հատուկ նշանակության ջոկատների վետերանների միությունը, որ մշտապես հետևում է մեր հայրենիքի սահմանների անվտանգության, անառիկության և անձեռնմխելիության հարցերին` ապրիլյան քառօրյա պատերազմի հենց առաջին ժամերին ջոկատներ կազմավորելով՝ մեկնեց ղարաբաղյան ռազմաճակատ: Այդպես եղել և կլինի միշտ:
Հայաստանի միջազգային ոստիկանական ասոցիացիան և Միլիցիայի հատուկ նշանակության ջոկատների վետերանների միությունը միշտ պատրաստ են վտանգելու իրենց կյանքը, եթե դա պահանջում է Հայրենիքի շահը:
Սիրելի՛ բարեկամներ, մի քանի ժամից մենք բոլորս մեծ հույսերով կդիմավորենք նաև նոր` 2017 թվականը: Ամանորի և Սուրբ Ծննդի կապակցությամբ շնորհավորում և ամենայն բարիք եմ մաղթում բոլորիդ։ Թող 2017-ը լինի խաղաղության և նպատակների իրականացման տարի, հայ օջախներում իշխի բարեկեցությունն ու երջանկությունը: Հատուկ շնորհավորում եմ հայոց հզոր, հաղթանակած և անպարտելի բանակի մեր պաշտպաններին, ովքեր հսկում են մեր անդորրը և անառիկ պահում հայոց սահմանները: Աստված պահապան ձեզ և ձեր ընտանիքներին:
Սիրելի՛ հայրենակիցներ, 2017 թվականը նաև կարևոր քաղաքական իրադարձության տարի է, մի քանի ամսից մեր երկրում տեղի կունենան համապետական ընտրություններ և գաղտնիք չէ, որ Հայաստանում տիրող աղաղակող անարդարությունները, համատարած աղքատությունն ու մեծ չափերի հասնող արտագաղթը ջլատել են հազարավոր մարդկանց և սպանել հավատը արդարության հանդեպ: Ես ուզում եմ խիզախություն ունենալ և այս ամենին ասել` ՈՉ: Ուզում եմ կրկին հավաստիացնել, որ Հայաստանի միջազգային ոստիկանական ասոցիացիան և Միլիցիայի հատուկ նշանակության ջոկատների վետերանների միությունը` իմ գլխավորությամբ, ունենք բավարար ուժ, կամք, խիզախություն և վճռականություն` պայքարելու բոլոր անարդարությունների դեմ և երկիրը դուրս հանելու խորը ճգնաժամից:
Կրկին շնորհավորում եմ բոլորիս Ամանորի և Սուրբ Ծննդի կապակցությամբ:
Աստված պահապան հայ ազգին:
Սիրով, հարգանքով և հավատով` գնդապետ Գրիշա Սարգսյան