Հղիների՝այսուհետ իրենց մարզերում ծննդաբերելու որոշման մասին խոսում են մարզերի գլխավոր բժիշկները

Առողջապահության նախարարության որոշմամբ մարզերի հղիները այսուհետ պիտի ծննդաբերեն իրենց մարզերում՝ բացառությամբ այն դեպքերի, եթե այդ հղիները համարվում են ռիսկային, այդ դեպքում նրանք կարող են գալ Երևան և ծննդաբերել իրենց նախընտրած բժշկի մոտ:

Եթե հղին այնուամենայնիվ ցանկանում է ծննդաբերել Երևանում, ապա պետք է վճարի 107.000 դրամ:

Թեմայի հետ կապված Operativ.am–ի թղթակիցը զրուցեց Հանրապետության մի քանի հիվանդանոցների գլխավոր բժիշկների հետ:

«Սա մի միջոցառում է, որի ժամանակ ծննդօգնությունը կտրամադրվի տեղում. դրանով անշուշտ այս ծրագիրը ողջունելի է, որովհետև մարզերից հղին չպետք է տեղափոխվի այդ ընթացքում:

Դա մի ռազմավարություն է, որը մշակվել է Առողջապահության նախարարության կողմից:

Կարծում եմ, որ այն իր արդյունքները կտա, հիմա դժվարանում եմ ասել, թե ինչքանով օգտակար կլինի, որովհետև Երևանի տարբեր կլինիկաներում կա այն վիճակը, որ վիճակը ծանրացնեն, կոպիտ ասած՝ անեն ամեն ինչ, որ հիվանդն իրենց մոտ մնա, բայց ամեն դեպքում կարծում եմ՝ այս ծրագիրը կկանխարգելի նման տիպի մոտեցումները»,- ասաց Գորիսի կլինիկայի գլխավոր բժիշկ Սլավիկ Ամիրյանը:

«Այդ որոշումն արդյունավետ է այնքանով, որ  հղիներն անտեղի դուրս չեն գա իրենց սպասարկման տարածքից, և բժշկական կենտրոնները ֆինանսական միջոցներ կունենան այդ հիմնարկը պահելու համար, ուստի ինչ-որ չափով դրական ազդեցություն կունենա: Չեմ կարծում, որ այն կոռուպցիոն ռիսկ պարունակի՝ ի՞նչ տարբերություն հղին ծննդաբերում է Երևանում, թե մարզային կենտրոնում, պարզապես մարզային կլինիկաները հնարավորինս կշնչեն, մի քանի հղիներով չեն կարող զարգանալ»,- մեզ հետ զրույցում նշեց Հրազդան քաղաքի հիվանդանոցի տնօրեն Ռոբերտ Սահակյանը:

«Ես չեմ ճանաչում Ձեզ, ոչ էլ ուզում եմ պատասխանեմ այդ հարցին»,- հարցը լսելով նման պատասխան տվեց Հոկտեմբերյան քաղաքի գլխավոր գինեկոլոգ Սարգիս Խաչատրյանը:

Առողջապահության նախարարության գլխավոր մանկաբարձ-գինեկոլոգ Ռազմիկ Աբրահամյանն էլ  չցանակացավ որևէ մեկնաբանություն տալ: