Գյումրու երկրաշարժը «վերապրած» վարսավիրանոցը (լուսանկարներ)
Գյումրու ողբերգությունը Հայաստանի պատմության մեջ համարվում է ամենասարսափելիներից մեկը: 1988 թվականի դեկտեմբերի 7-ին տեղի ունեցավ Սպիտակի հզոր երկրաշարժը, ինչը կարելի է համեմատել տասնյակ ատոմային ռումբերի պայթյունի հետ: Ընդգրկելով հանրապետության որոշակի մասը, այն կործանեց Սպիտակը, Լենինականը (այժմյան Գյումրի), Կիրովականը (այժմյան Վանաձոր) և այլ քաղաքներ: Այս մասին հայտնում է Lenta.ru-ն՝ պատմելով Գյումրու խորհրդանիշներից մեկի ու իր վարպետների մասին:
Աղետը խլեց 17 հազար գյումրեցու կյանք, որոնք ապրում էին Երևանից հետո մեծությամբ երկրորդ քաղաքում: Բայց հողի մի կտորի վրա, ավերված շինությունների կողքին, մինչև հիմա կանգուն է մնացել քաղաքի ամենահին վարսավիրանոցը` «Լյուքս»-ը: Սրահը, որը չի փակել իր դռները նույնիսկ Երկրորդ համաշխարհային պատերազմի ժամանակ, շարունակում է սպասարկել նախկին Լենինականի հաճախորդներին:
Այդ օրը հիշել սրահում չեն սիրում. չափից շատ ցավոտ է:
«Լյուքս» սրահը բացվել է 1941 թվականին:
Վարսավիրանոցի ղեկավար Դավիթ Գալստյանի խոսքով, որն այնտեղ է աշխատում արդեն 35 տարի, սրահը մեկ անգամ է վերանորոգվել` 1986 թվականին:
1988 թվականի աղետի ժամանակ, շինությունը` կառուցված 20-րդ դարի 20-ականներին, չի տուժել: Հաստ պատերը, յուրաքանչյուրը` 1 մետր հաստությամբ, ամբողջ շինության պահապանն են դարձել՝ չնայած 9 բալանոց երկրաշարժին:
«Գետինն այնպես ցնցվեց, որ ոտքի վրա մնալն անհնար էր: Բարձրահարկ շինությունները փլվում էին աչքներիս առաջ: Ես վազեցի երեխաներիս հետևից, որոնք դպրոցում էին: Փառք Աստծուն, նրանք ողջ էին, բայց կնոջս ես կորցրի... նրան 11 օրից գտան` փլված շինության տակից: Հուղարկավորել ենք գիշերը, որպեսզի երեխաները չտեսնեն», - հիշում է Գալստյանը: