ՀՀ ԱԺ պաշտպանության, ազգային անվտանգության և ներքին գործերի մշտական հանձնաժողովի պատվիրակության աշխատանքային այցը ԼՂՀ (լուսանկարներ)

Նոյեմբերի 4-6-ը ՀՀ Ազգային ժողովի պաշտպանության, ազգային անվտանգության և ներքին գործերի մշտական հանձնաժողովի պատվիրակությունը` հանձնաժողովի նախագահ Կորյուն Նահապետյանի գլխավորությամբ, եռօրյա աշխատանքային այցով եղել է Լեռնային Ղարաբաղի Հանրապետությունում:
Հանձնաժողովի պատվիրակությունը ԼՂՀ Ազգային ժողովի պաշտպանության, անվտանգության և օրինապահպանության հարցերով մշտական հանձնաժողովի նախագահ Ժաննա Գալստյանի և ԼՂՀ անվտանգության խորհրդի քարտուղար Վիտալի Բալասանյանի ուղեկցությամբ այցելել է Արցախի հյուսիս-արևելյան և հարավային ուղղությամբ տեղակայված զորամասեր և մարտական դիրքեր:

Պատվիրակության անդամները ծանոթացել են ապրիլյան դեպքերից հետո առաջնագծում մարտական դիրքերի կահավորման, տեխնիկական վերազինման և ամրաշինական աշխատանքներին, զրուցել զինծառայողների և հրամանատարների հետ բանակի պատրաստականության, մարտական հերթապահության իրականացման, անձնակազմի անվտանգության, սոցիալական ապահովության և այլ հարցերի շուրջ:

Այցի շրջանակներում Մարտակերտում հանձնաժողովի պատվիրակությունը ԼՂՀ արտակարգ իրավիճակների պետական ծառայության տնօրենի, շրջանի վարչակազմի ղեկավարի և Մարտակերտ, Մատաղիս, Թալիշ և Ներքին Հոռաթաղ համայնքների ղեկավարների հետ մասնակցել է բնակչության քաղաքացիական պաշտպանության հարցերով անցկացված խորհրդակցությանը:

Առանձնահատուկ կարևորվել են նոր իրողությունների պայմաններում ոլորտային ռազմավարության վերանայումը, լրացուցիչ միջոցների ներգրավումը, քաղաքացիական պաշտպանության բնագավառում արդյունավետ մեխանիզմների ներդրումը, բնակչության իրազեկման, կառավարման մարմինների և համայնքների ղեկավարների փոխգործակցության մակարդակի բարձրացումը:

Նոյեմբերի 5-ին հանձնաժողովի պատվիրակությանն ընդունել է Արցախի Հանրապետության նախագահ Բակո Սահակյանը: Հանձնաժողովի նախագահ Կորյուն Նահապետյանը ներկայացրել է պատվիրակության կատարած դիտարկումների արդյունքները՝ նշելով առաջնագծում մեծածավալ ինժեներական-ամրաշինական աշխատանքների մասին, խոսել է զինծառայողների և բնակչության անվտանգության ռազմավարական ու հայեցակարգային մոտեցումների, պաշտպանական կարողությունների ամրապնդման և այդ հարցում երկու պետությունների խորհրդարանական համագործակցության ընդլայնման մասին:

Արցախի Հանրապետության նախագահը գոհունակություն է հայտնել խորհրդարանական հանձնաժողովների համատեղ աշխատանքի, նրանց իրականացրած համակողմանի դիտարկումների կապակցությամբ, կարևորել նման համագործակցությունը և բարձր գնահատել խնդիրներին հետեւողական և արագ արձագանքելու հանձաժողովների պատրաստակամությունն ու գործնական քայլերը:

Նոյեմբերի 6-ին Արցախի պաշտպանության գերակա ուղղությունները հանգամանալից քննարկվել են պաշտպանության բանակի հրամանատար Լևոն Մնացականյանի հետ:

Պատգամավորները կիսվել են առաջնագծից իրենց ստացած տպավորություններով, բարձրացրել զորային օղակի կառավարմանը, բանակի համալրմանը, զորահավաքային ռեսուրսների օգտագործմանը, սպառազինության և ռազմական տեխնիկայի նոր միջոցների ձեռքբերմանը, ինժեներական աշխատանքների իրականացմանը վերաբերող և  այլ հարցեր:

Պաշտպանության բանակի հրամանատարը պատասխանել է պատգամավորների հարցերին:

Նույն օրը ՀՀ Ազգային ժողովի պաշտպանության, ազգային անվտանգության և ներքին գործերի և ԼՂՀ Ազգային ժողովի պաշտպանության, անվտանգության և օրինապահպանության հարցերով մշտական հանձնաժողովները համատեղ նիստում ամփոփել են այցի ծրագրի շրջանակներում իրականացրած աշխատանքների արդյունքները, քննարկել հանձնաժողովների հետագա անելիքները: Կրկին կարեւորել է երկու հանձնաժողովների միջեւ ակտիվ փոխգործակցությունը, մի շարք ուղղություններով համատեղ քննարկումներ կազմակերպելու անհրաժեշտությունը:

ՀՀ Ազգային ժողովի պաշտպանության, ազգային անվտանգության և ներքին գործերի մշատական հանձնաժողովի պատվիրակության անդամները այցելել են Ստեփանակերտի հուշահամալիր, ծաղիկներ դրել և հարգանքի տուրք մատուցել Արցախի անկախության համար զոհված և անհայտ կորած ազատամարտիկների հիշատակին: