Ո՞ւմ պրոդյուսերությամբ է զբաղվում Սոնա Շահգելդյանը

Վերջերս esyes.am-ն իմացավ, որ երգչուհի Սոնա Շահգելդյանն այժմ էլ ներկայանում է որպես պրոդյուսեր: Այս մասին զրուցեցինք Սոնայի հետ, ով հաստատեց, որ արդեն մոտ քսան օր է, ինչ համագործակցում է Ֆրանսիայում բնակվող Հրանտոյի հետ և այսուհետև ինքն է զբաղվելու նրա գործերով. «Հրանտոն ինձ խնդրել է զբաղվել իր գործունեությամբ, քանի որ ցանկանում է որոշակի քայլել անել հայկական շոու բիզնեսում: Նա ինձ ֆեյսբուքով է գրել ու նշել, որ ինձ շատ է սիրում և ցանկանում է համագործակցել: Ինչքան էլ զբաղված եմ լինում, փորձում եմ պատասխանել ինձ գրողներին: Ինչքանով կարողանամ կօգնեմ նրան և պրոֆեսիոնալ խորհուրդներ կտամ»:

Սոնայի խոսքերով' Հրանտոն երգեր ունի, սակայն տեսահոլովակ չունի: «Մենք դեռևս չենք հանդիպել. հավանաբար նա Հայաստան կգա և կսկսենք համագործակցել: Եթե նա վատ երգի, կասեմ, որ չշարունակի այս ոլորտում աշխատել, որովհետև միայն սիրվելու ու ճանաչվելու համար պետք չէ երգել»,-անկեղծորեն նշեց երգչուհին:
esyes.am-ը կապ հաստատեց նաև Հրանտոյի հետ, ով ծնվել է ԱՄՆ-ում, իսկ այժմ Ֆրանսիայում է բնակվում և սովորում է տեղի Կոնսերվատորիայում. նաև հաճախում է կիթառի ու վոկալի պարապմունքների: Հրանտոյի խոսքերով' երգել սիրել է փոքրուց. «Արդեն մոտ յոթ երգ ունեմ, որոնցից մեկը «Թե լսում ես» երգն է, որը շուտով տեսահոլովակ կունենա: Խոսքերի հեղինակը ես եմ, իսկ երաժշտությունը Սյուզի Մովսեսյանն է գրել»: Բացի իր հեղինակային երգերից, Հրանտը կատարել է նաև հայտնի երկու երգ' Միհրան Ծառուկյանի «Ես համաձայն եմ սիրել» ու Լիլիթ Հովհաննիսյանի «Նրան» երգերը:

Բացի Հրանտոյի հետ համագործակցությունից, Սոնայի հետ խոսեցինք նաև իր ստեղծագործական կյանքից, Ֆրանսիա կատարած ճամփորդությունից և առաջիկա ծրագրերից: Երգչուհու փոխանցմամբ' իր մտերիմ մարդկանցից մեկն իրեն ու մորաքրոջը հրավիրել էր Ֆրանսիա' հանգստանալու և մասնակցելու «Կաննի» փառատոնին: «Առաջին անգամ էի Ֆրանսիայում: Մայիսի 15-ին մասնակցեցինք փառատոնի բացման արարողությանը, այնուհետև հանգստացանք. եղել ենք Կաննում, Մոնակոյում և այլ երկրներում: Տեսել ենք նրանց գեղեցիկ պալատները, ծանոթացել մշակույթին»,- պատմեց երգչուհին:

Պարզվում է, Սոնան Ֆրանսիայում բացի հանգստանալուց, հասցրել է զբաղվել իր գործունեությամբ: Նրա խոսքերով' հանդիպել է համերգիների կազմակերպչական գործերով զբաղվող մարդկանց հետ, որպեսզի այնտեղ մենահամերգ ունենա, ինչպես նաև պայմանավորվել է, որ իր ֆրանսերեն երգը հնչի ֆրանսիական ռադիոկայաններով:

Հանգստից հետո Սոնան վերադարձել ու անցել է աշխատանքի: Այժմ նա շարունակում է երգել երևանյան ակումբներից մեկում և հաղթանակների այս ամսում մասնակցել է որոշ միջոցառումների:

Տեղեկացնենք նաև, որ մոտ մեկ ամիս առաջ երգչուհին նոր տեսահոլովակ է նկարահանել իր «Հարսի պար» երգի հիման վրա, որն այժմ մոնտաժային փուլում է և հանդիսատեսին կներկայացվի հունիսին: Առաջիկայում Սոնան և Սևակ Ամրոյանը պատրաստվում են «Սարերի հովին մեռնեմ» երգի հիման վրա տեսահոլովակ նկարահանել: Երգչուհին մեծ ցանկություն ունի նաև իր կատարմամբ ֆրանսերեն երգի հիման վրա տեսահոլովակ նկարահանել: