Ադրբեջանը երկրի ներսում լուրջ խնդիրներ, ունի, ուստի, ժամանակավորապես կհրաժարվի Արցախյան ճակատում իրավիճակի սրացումներից. Արտյոմ Տոնոյան (տեսանյութ)

Այսօր՝ սեպտեմբերի 30-ին, իրանագետ Արտյոմ Տոնոյանը խոսեց Ադրբեջանում սահմանադրական բարեփոխումների հանրաքվեի, սպասվելիք իրավիճակի մասին, և թե ինչպես կանդրադառնա հանրաքվեն ԼՂՀ հիմնահարցի լուծման վրա:

Արտյոմ Տոնոյանի խոսքով՝ սահմանադրական փոփոխությունների այս նախաձեռնությունը ցույց տվեց, որ Իլհամ Ալիևը սպասում է երկրում իրավիճակի վատթարացման՝ տնտեսական առումով: 

«Կա տեսակետ, որ այս նախաձեռնությունը՝ հանրաքվեն, տեղի ունեցավ նաև ապահովագրելու հենց այդ առումով, քանի որ նավթի գների աննախադեպ անկում է նկատվում և հանրային բողոքի ալիք կար, որը տեսանք հանրաքվեի նախորդող շրջանում: Գուցե սա կարող է լինել իշխանության ապահովագրում: Ունենալով լուրջ խնդիրներ երկրի ներսում, հավանաբար, Ադրբեջանում կհրաժարվեն այսպես կոչված Ղարաբաղը հետ վերադարձնելու ցանկությունից կամ այն քաղաքականությունից, որն իրականցվում էր վերջին տարիների ընթացքում: Լուր տարածվեց, որ նոր ռազմական բյուջեն հաստատվել է 4 անգամ նվազումով: Նույնիսկ առաջարկել են ռազմական բյուջեի ծախսերը կրճատել մինչև 1 միլիարդ, ինչը խոսում է նրա մասին, որ, ժամանակավորապես, հավանաբար, Ադրբեջանում հրաժարվելու են Արցախյան ճակատում իրավիճակի սրացումներից»,- ասաց իրանագետ Արտյոմ Տոնոյանը:

Նրա պնդմամբ՝ քանի որ Ադրբեջանում սպասվում են տնտեսական վատթարացումներ, այդ առումով, կա տեսակետ, որ սահմանադրության այս փոփոխությունը միտված էր հենց դրան:

«Մի հետաքրքիր կետ, որ մտցվեց Սահմանադրությունում, այն է, որ Ալիևը հնարավորություն ստացավ ցանկացած ժամանակ լուծարել խորհրդարանը: Այս պահին, բնականաբար, «Նոր Ադրբեջան» կուսակցությունն է խորհրդարանում մեծամասնություն կազմում, սակայն, այս առումով էլ հավանական վախերից իրեն ապահովագրում է»,- նշեց Արտյոմ Տոնոյանը:

Մանրամասները՝ տեսանյութում: