Ռուսական մամուլը՝ ՀՀ անկախության 25-րդ տարեդարձի զորահանդեսին ցուցադրված «Իսկանդեր»-ի և «Սմերչ»-ի մասին

Հայաստանի Հանրապետությանը մայրաքաղաք Երևանում տեղի ունեցավ Անկախության 25-րդ տարեդարձին նվիրված զորահանդեսը: Այլ տեխնիկայի հետ մեկտեղ ցուցադրվել են «Իսկանդեր 9К720» օպերատիվ տակտիկական համալիրներ և «Սմերչ» ռեակտիվ համազարկային կրակի համակարգեր: Վերջիններս հատկապես գրավել են ռուսական մամուլի ուշադրությունը:

«Комсомольская правда»-ն նկատում է, որ «Իսկանդեր»-ները ամենաժամանակակից հրթիռային համալիրներից մեկն են, որոնք մշակվել են Ռուսաստանում 2006 թ-ին: Ոչնչացման շառավիղը 500 կմ է: Հրթիռների մարտագլխիկները կարող են լինել նաև միջուկային:

Թերթը գրում է, որ «Սմերչ»-ները հայկական բանակում են հայտնվել միայն այս տարի: Դրանց ոչնչացման մակերեսը կազմում  է 600 քառ. կմ:

«РИА Новости» լրատվական գործակալությունը նշում է, որ զորահանդեսը դարձավ տոնական օրվա կարևորագույն իրադարձությունը: Գործակալությունը ներկայացնում է այն զինտեխնիկան, որը ցուցադրվել է զորահանդեսին, այդ թվում` «Բուկ M2» հակաօդային պաշտպանության համալիրներ, «Պեչորա -2M2» մոդեռնիզացված C-125, որոնք լրացրել են արդեն իսկ առկա С-300-ներին, տակտիկական հրթիռային համալիրներ «Точка У» և «Էլբրուս»: Վերջինս P-17 բալիստիկ հրթիռներով է` ըստ ՆԱՏՕ-ի որակավորման «Scud»:

Գործակալությունն ուշադրություն է դարձնում նրան, որ զորահանդեսին ցուցադրվեցին նաև «Կռունկ» հայկական արտադրության անօդաչու սարքերը:

Ռուսական լրատվամիջոցներն ընդգծում են նաև զորահանդեսին ռուսական զորքերի ստորաբաժանման մասնակցությունը: «ТАСС»-ը գրում է, որ դրանք Հայաստանում են գտնվում Մոսկվայի և Երևանի միջև միջպետական պայմանագրի համաձայն:

ՀՀ անկախության 25-րդ տարեդարձի զորահանդեսին են անդրադարձել նաև այլ լրատվամիջոցներ` «Взгляд»-ը, «Regnum»-ը և այլն: