Ապրիլյան պատերազմի ժամանակ հենց անկախության սերունդն էր, որ կյանքի գնով դիմակայեց Ադրբեջանի ագրեսիային. քաղաքագետ (տեսանյութ)

Այսօր՝ սեպտեմբերի 20-ին, լրագրողների հետ հանդիպման ժամանակ քաղաքագետ Արթուր Ղազարյանը խոսեց սեպտեմբերի 21-ին Հայաստանի անկախության 25-ամյակի, անկախության ձեռքբերումների ու բացթողումների մասին:

Արթուր Ղազարյանի խոսքով՝ անկախության արժեքը մեր օրերում դեռևս հիմնովին հասարակության սեփականությունը չի դարձել և այդ նստվածքը չկա ցավոք սրտի:

«Եթե մենք հայրենիքը, պետությունը, ազգը մեր օրերում գովերգում ենք, ապա, ցավոք սրտի, անկախության արժեքը որպես այդպիսին չեն բարձրաձայնում նույնիսկ մեր մտավորականները կամ գոնե աշխատություններ չեն նվիրում դրան: Վերջինը, երևի լուսահոգի Սահյանն էր, ով հիշատակեց անկախությունը, այն էլ՝ ընդամենը միտք արտահայտեց: Նա շատ դիպուկ նկատել էր, որ անկախությունը տվեց այն լույսը, օդը, հնարավորությունը, որ ազգերի մեջ հայ ազգը, որպես անկախ պետականություն կրող, կարող է իր տեղն ու դերն ունենալ»,-ասաց քաղաքագետ Արթուր Ղազարյանը:

Նրա պնդմամբ՝ այսօր կոնսոլիդացման խնդիր կա, որ անկախության տարիներին մենք չկարողացանք հաջողացնել և հասնել ազգային կոնսոլիդացիայի:

«Բնականաբար, անկախության այս տարիների ընթացքում չկարողացանք հասնել 100% Սփյուռքի վստահությանը դեպի Հայաստան, հայրենիք: Միգուցե այստեղ նաև պրոբլեմներից մեկը կարելի է կապել «Վիետնամական սինդրոմի» հետ, երբ ռազմի դաշտից վերադառնում են ազատամարտիկները կամ կռված տղերքը, ովքեր պետք է քաղաքական, տնտեսական ոլորտներում ինտեգրվեն և ազդեցիկ պաշտոններ զբաղեցնեին, որն էլ բերեց մեր օրերում տնտեսական, քաղաքական և ռազմական ոլորտների սերտաճմանը: Մենք տեսնում ենք իշխանության, հասարակության կողմից քայլեր, որպեսզի դրանք տարանջատեն, բայց շատ դժվարությամբ է տարանջատվելու»,- նշեց բանախոսը:

Նրա խոսքով՝ մենք որպես անկախ պետականություն, միջազգային իրավունքի սուբյեկտ, պետք է նաև ինտեգրվենք համաշխարհային տնտեսությանը, մշակույթին, իսկ վերջիններիս ինտեգրվելու համար նախ մենք պետք է տարածաշրջանային տնտեսական բլոկներին ինտեգրվենք:

«Շատ կարևոր հանգամանքներից է նաև հայեցի դաստիարակությունն ու կրթությունը մեր օրերում: Այստեղ էլ մենք լուրջ խնդիրներ ունենք, բայց անկեղծ ասած, երբ հայ մանուկը հայկական դպրոց գնում և հայեցի դաստիարակություն է ստանում, սա, բնականաբար, բերում է իր դրական էֆեկտները: Պատահական չէ, որ ապրիլյան դեպքերի ժամանակ հենց անկախության, հայեցի դաստիարակություն ստացած սերունդն էր, որ կարողացավ իրեն փայլուն դրսևորել թշնամու ագրեսիայի դեմ, իհարկե, ծանր զոհողությունների գնով: Հավերժ փա՛ռք նրանց բոլորին, բայց ամեն դեպքում, դա հենց անկախության սերունդն էր, որ ի տարբերություն այլ պարագաների կամ ավագ սերնդի՝ իր ուրույն դերն ունի»,- պնդեց Արթուր Ղազարյանը:

Տեսանյութը՝ շուտով: