Պատմաբանը՝ Երրորդ Հանրապետության ստեղծման, անցած ճանապարհի և ձեռքբերումների մասին (տեսանյութ)

Այսօր՝ սեպտեմբերի 20-ին, լրագրողների հետ հանդիպման ժամանակ ԵՊՀ պատմության ֆակուլտետի դեկան Էդիկ Մինասյանը խոսեց սեպտեմբերի 21-ին Հայաստանի անկախության 25 ամյակի, անկախության ձեռքբերումների ու բացթողումների մասին:

Էդիկ Մինասյանի խոսքով՝ արդեն քառորդ դար է, որ մենք ստեղծել ենք անկախ պետություն: Անկախության արժեքը մեր ժողովրդի դարավոր երազանքն է եղել և մենք անկախության ստեղծման առաջին փորձն ունենք Առաջին Հանրապետության տարիներին՝ 1918-1920 թվականներին: «2,5 տարվա գոյատևման պայմաններում, փաստորեն, այդ փորձը յուրացրել ենք, ստեղծել ենք և ստեղծեցինք պետական կառույց, որի առկայության դեպքում մենք կարողացանք ապահովել նաև Երկրորդ Հանրապետության գոյությունը: Եթե չլիներ այդ անկախ պետական կառույցը, բնականաբար, չէր լինի նաև Խորհրդային Հայաստանը: Այս նույն հիմքի վրա էլ առաջացավ Երրորդ Հանրապետությունը, որն ըստ էության կարելի է ասել 1-ին Հանրապետության իրավահաջորդն է: Չպետք է մոռանանք, որ Երրորդ Հանրապետությունը ստեղծվեց չափազանց բարդ ու լարված իրավիճակում»,- ասաց ԵՊՀ պատմության ֆակուլտետի դեկան Էդիկ Մինասյանը:

Նա նշեց, որ ԽՍՀՄ-ի քայքայման գործընթացն էր սկսվել և մյուս հանրապետությունների շարքում անկախացավ նաև Հայաստանը, բայց մենք այդ անկախությունը ձեռք բերեցին Արցախյան ազատագրական պայքարի ընթացքում: «Չմոռանանք, որ այս շարժումը՝ մեր ամենամեծ ձեռքբերումը, հենց ազատ և անկախ Արցախի արդեն գոյությունն էր, երբ մենք կարողացանք մեր ժողովրդի սխրանքների, արյան գնով հաղթահարել Ադրբեջանի սանձազերծած պատերազմն Արցախի դեմ և հաղթանակով ավարտել, որն ավարտվեց Արցախի անկախությամբ և պետական իշխանության կայացմամբ: Փա՛ռք Աստծո, մենք ունեցանք 2 Հայաստանի Հանրապետություն», -նշեց Էդիկ Մինասյանը:

Նրա պնդմամաբ՝ մեր պետականության վերականգմանը մենք հասանք ըստ էության 1990 թվականի օգոստոսի 23-ին՝ Անկախության հռչակագրով: Գործընթացը շարունակեց 1991թվականի սեպտեմբերի 21-ի հանրաքվեն, որից հետո՝ սեպտեմբերի 23-ին, Գերագույն խորհուրդը հաստատեց հանրաքվեի արդյունքները, որով Հայաստանը դարձավ անկախ: Հարցադրումն այսպես էր. «Համաձա՞յն եք, որ ՀՀ-ն լինի անկախ ժողովրդավարական պետություն՝ ԽՍՀՄ-ի կազմից դուրս»:

«Ժողովուրդն իսկապես մասնակցեց և իր ձայնը տվեց անկախության օգտին: Սեպտեմբերի 23-ին էլ Գերագույն խորհուրդը հաստատեց հանրաքվերի արդյունքները: 70-ամյա ընդմիջումից հետո հաջողվեց ստեղծել անկախ Հայաստանի Հանրապետություն»,- նշեց բանախոսը:

Էդիկ Մինասյանն առանձնացրեց կարևորագույն ձեռքբերումներ.

1. Հայոց պետականության վերականգնումը

2. Ազատ, անկախ Արցախի ձեռքբերումը

3. Հայոց ցեղասպանության միջազգայնացումը

4. Հայոց պետականության հիմք հանդիսացող ազգային բանակի կազմավորումը

5. Ազգային դրամի գործակցությունը՝ իբրև ինքնուրույնության լավագույն դրսևորում

Առավել մանրամասն՝ տեսանյութում: