Եթե հիմա հայտարարես, որ տնտեսական համագործակցություն ես ուզում սկսել Թուրքիայի հետ, ապա քեզ դավաճան կհամարեն. Արամ Մանուկյան (տեսանյութ)
Այսօր՝ սեպտեմբերի 20-ին, լրագրողների հետ հանդիպման ժամանակ ԱԺ ՀԱԿ խմբակցության պատգամավոր Արամ Մանուկյանը խոսեց սեպտեմբերի 21-ին Հայաստանի անկախության 25-ամյակի, պետության համար անկախությունն որպես արժեքի մասին:
Արամ Մանուկյանը լրագրողներին նվիրեց Հայաստանի Հանրապետության Անկախության 25-ամյակի փաստաթղթերի ժողովածու, որտեղ ներառված է ՀՀ անկախության ամբողջ պատմությունը և հենց այդ գրքից էլ առանձնացնելով որոշ սկզբունքներ, ներկայացրեց ամբողջ պատմությունը: Նա նշեց, որ հայ ժողովրդի պատմության մեջ եղել է 8 անկախության շրջան:
«Մենք՝ մեր պատության մեջ, ունեցել ենք 8 անգամ անկախություն, պետականություն: Առաջինը եղել է մեր թվարկությունից առաջ 860 թվականին՝ Արամե արքայի ժամանակ և այդ պետականությունը տևել է 270 տարի: Հաջորդն եղել է մ.թ.ա. 570 թվականին՝ Երվանդունիների ժամանակ...իսկ վերջինը՝ 1991 թվական սեպտեմբերի 21-ին: Աստված մեր ժողովրդին խելք, ուժ, կամք, հուր և համառություն տա, որ սա լինի վերջին անկախությունը: Ինձ հաճախ ասում են՝ «Կկարդա՞ք Անկախության հրչակագիրը», իսկ ես միշտ մերժել եմ: Վերջինս երեխայի ծնվելու նման մի բան է և նույն երեխան երկու անգամ չի կարող ծնվել: Այն պետք է պահպանել, հզորացնել և հանձնել անկախությունը սերունդներին: Խելոք է այն սերունդը, իշխանությունը, որը կարողանում է իր ունեցածը, ստացածը պահել, ուժեղացնել և հանձնել սերունդներին»,- ասաց ԱԺ ՀԱԿ խմբակցության պատգամավոր Արամ Մանուկյանը:
Նրա խոսքով՝ ՀՀ անկախության սկիզբը փաստագրության առումով համարվում է Հայոց համազգային շարժման ծրագիրը (19 օգոստոսի, 1988թ.): Այդ ժամանակ Հայաստանը դեռ Սովետական Միության մի մասն էր, որը միակենտրոն, միակուսակցական համակարգով իշխում էր բոլոր ազգերին:
Առանձնացնելով ծրագրի սկզբունքներից, բանախոսը նշեց, որ այդ շարժումն ուներ մի քանի շատ կարևոր սկզբունք, որոնք ռեալիստական էին: Անդրադառնալով սկզբունքներից մեկին. այն է՝ «Մեր շարժումն ուղղված չէ որևէ ժողովրդի դեմ: Մեր սկզբունքն է՝ խաղաղ, համերաշխ ապրել հարևան բոլոր ժողովուրդների հետ»: Նրա խոսքով՝ այս պարզունակ միտքն անգամ հիմա, ՀՀ քաղաքական ուժերը վախենում են արտահայտել:
«Եթե հիմա հայտարարես, որ ես պատրաստ եմ թուրքերի հետ հարևանցիորեն տնտեսական կապեր ապահովելով ապրել, համագործակցել, ապա քեզ դավաճան կհամարեն»,- ասաց պատգամավորը:
Նրա պնդմամբ՝ մենք դուրս էինք եկել կոմունիստների դեմ պայքարի, մենք պայքարում էինք Հայաստանի և Սովետական Միության իշխանության դեմ: Շարժումը ստիպեց Հայաստանի իշխանություններին անել քայլեր, որոնք անկախության ճանապարհին շատ լուրջ քայլեր էին:
Բանախոսի խոսքով՝ Սովետական Միությունը պաշտոնապես փլուզվեց 1990 թվականի դեկտեմբերին, այսինքն՝ մենք անկախության գործընթաց իրականացրել և անկախ ենք եղել շուրջ երկու տարի այն ժամանակահատվածում, երբ դեռ կար Սովետական Միությունը: «Սա մեր յուրահատկույթյունն է անկախության գործընթացի մեջ, որովհետև մեզնից հետո էլ այլ երկրներ, ժողովուրդներ են անցել այս ճանապարհով: 1991 թ. մարտի 1-ին եկավ հրահանգ, որ Սովետական Միության բոլոր ժողովուրդները կազմակերպում են հանրաքվե ԽՍՀՄ-ի պահպանման համար: ՀՀ Գերագույն խորհուրդը որոշեց մերժել ԽՍՀՄ-ի պահպանման վերաբերյալ հանրաքվեն և հենց մարտի 1-ին էլ որոշում կայացվեց անցկացնել մեր հանրաքվեն՝ Սովետական Միության սահմանադրության համաձայն, որը պետք է անցկացվեր 6 ամիս հետո՝ ըստ օրենքի: Այդ օրը որոշվեց հարցը՝ «Համաձա՞յն եք, որ ՀՀ-ն լինի անկախ ժողովրդավարական պետություն՝ ԽՍՀՄ-ի կազմից դուրս», և հանրաքվեն անցկացվեց 1991 թվականի սեպտեմբերի 21-ին»,- ասաց Արամ Մանուկյանը:
Նա նաև հավելեց, որ կար մի հետաքրքիր որոշում, ըստ որի՝ եթե Սովետական Միությունը փորձեր զորք մտցնել Հայաստան, ապա հանրաքվեի գործընթացն արագացվելու էր:
Մանրամասները՝ տեսանյութում: