Հայ առաքելական եկեղեցին նշում է Սբ. Աստվածածնի Վերափոխման տոնը (տեսանյութ և լուսանկարներ)

Այսօր` օգոստոսի 14-ին, եկեղեցիներում մատուցվեց սուրբ պատարագ և նշվեց Սուրբ Աստվածածնի Վերափոխման տոնը, որը հայտնի է նաև որպես Խաղողօրհնեքի տոն: 

Սուրբ Աստվածածնի Վերափոխման տոնը (Խաղողօրհնեքի տոն) Հայ Առաքելական Սուրբ Եկեղեցու հինգ տաղավար տոներից չորրորդն է։ Այն նշվում է օգոստոսի 15-ի մերձակա կիրակի օրը (օգոստոսի 12-ից 18-ը)։ Տոնն ունի շաբաթապահք, նավակատիք և մեռելոց։
Սուրբ Աստվածածնի Վերափոխման տոնի ավարտին բոլոր եկեղեցիներում պատարագ է մատուցվում։

Հայ Առաքելական եկեղեցում տոնն առանձնահատուկ է նրանով, որ օգոստոսի այս շրջանում Հայաստանի հեթանոսական ժամանակից եկող՝ հասունացող խաղողի օրհնության ծեսով է պայմանավորված։ Այսինքն՝ տոնի օրը, պատարագից հետո կատարվում է խաղողօրհնեք, որից հետո միայն կարելի է խաղող ուտել։ Այդպիսով օրհնվում է տարվա ողջ բերքն ու բարիքը։

Նույն օրհնված խաղողից օրհնված գինի են պատրաստում, որը մարդիկ պահում են մինչև հաջորդ տարվա խաղողօրհնեքը՝ որպես լիառատության ապահովման նշան։

Մի հետաքրքիր խորհուրդ ունի տոնը կապված մարդկանց անունների հետ: Ըստ Հայ Առաքելական եկեղեցու Աստվածածնի վերափոխման տոնին տոնելի են՝ Մարիամ, Մարո, Մարի, Մարիանույշ, Տիրուհի, Իսկուհի, Սրբուհի, Մաքրուհի, Թագուհի, Լուսիկ, Լուսածին, Լուսաբեր, Լուսամայր, Արփենիկ, Երանյակ, Երանուհի, Արեգ, Արևիկ, Լուսնթագ, Աղավնի, Մարգարիտ, Նազիկ, Նազելի, Տենչելի, Դշխո, Բերկրուհի, Պերճուհի, Անթառամ, Արուսյակ, Կուսինե, Վերգինե, Վերժին, Արշալույս, Գեղանույշ, Գեղանիկ և Երջանիկ անունները։

Այսօր Մալաթիա-Սեբաստիա համայնքում գտնվող Սուրբ Երրորդություն եկեղեցում նույնպես պատարագ մատուցվեց: Եկեղեցին մարդաշատ էր, լի հավատացյալներով: Մարդիկ այցելում էին եկեղեցի զամբյուղներով լի խաղողները ձեռքներին, որպեսզի օրհնեն այն:

Operativ.am-ի պատրաստած ամփոփ տեսաշարում կարող եք դիտել պահեր՝ պատարագի արարողությունից, ինչպես նաև ակնթարթներ, որտեղ արտահայտում են մարդկանց հոգևոր ապրումները: