ԱՄՆ Պետքարտուղարությունը ամենամյա զեկույցում անդրադարձել է Հայաստանում կրոնի ազատության հարցին

ԱՄՆ Պետքարտուղարությունը հրապարակել է աշխարհում կրոնական ազատության մասին ամենամյա զեկույցը, որում նշվում է նաև Հայաստանի մասին: Հայաստանի մասով նշվում է, որ Սահմանադրությունը երաշխավորում է կրոնական ազատությունը և տարանջատում է կրոնական կազմակերպություններն ու պետությունը, սակայն, միաժամանակ ընդունում է Հայ առաքելական եկեղեցին որպես ազգային եկեղեցի, ազգային ինքնության պաշտպան:

Զեկույցում նշվում է, որ Հայաստանում 2015 թվականի դեկտեմբերի 6-ին տեղի ունեցած հանրաքվեին բոլոր մեծամասշտաբ սահմանադրական բարեփոխումներն ընդունվել են: Այն փոփոխությունները, որոնք վերաբերել են կրոնական ազատությանը, ուժի մեջ են մտել դեկտեմբերի 22-ից: 

Փոփոխությունները Սահմանադրություն են մտցնում այլընտրանքային ծառայության գոյություն ունեցող տարբերակը նրանց համար, ովքեր հրաժարվում են զինվորական ծառայությունից՝ ելնելով կրոնական համոզմունքներից, և ընդլայնում են այն հանգամանքները, որոնց դեպքում պետությունը կարող է սահմանափակում դնել կրոնի ազատության դրսևորումների վրա՝ ազգային անվտանգության նկատառումներով:

Կրոնական փոքրամասնություն կազմող խմբերը բախվել են մշակութային վայրեր կառուցելու համար թույլտվություն ստանալու խնդրի հետ, հասարակական ոլորտում աշխատելու հարցի հետ: Կառավարությունը հովանավորում է Հայ առաքելական եկեղեցու ներկայությունը հասարակական կյանքում և դպրոցներում եկեղեցու պատմության և քրիստոնեության դասերի անցկացումը:

«Եհովայի վկաները» հաղորդել են ֆիզիկական և հոգեկան ճնշումների մի քանի դեպքի մասին՝ չնայած նշել են, որ ոստիկանությունը, ընդհանուր առմամբ, արագ է արձագանքում նման դեպքերին:

ԱՄՆ կառավարության տվյալներով՝ Հայաստանում բնակչությունը կազմում է 3.1 միլիոն (2015 թվական), որից 92%-ը Հայ Առաքելական եկեղեցու հետևորդներ են:

Սահմանադրական փոփոխույունները «եկեղեցի»-ն փոխարինել են «կրոնական կազմակերպություններ» տերմինով, ինչը ենթադրում է կրոնի տարանջատումը պետությունից: