Հայաստանը բնապահպանական լուրջ խնդրի առաջ կարող է կանգնել. ահազանգում են բնապահպանները (տեսանյութեր)
Այսօր՝ օգոստոսի 10-ին, լրագրողների հետ հանդիպման ժամանակ բնապահպաններ Կարինե Դանիելյանը և Ինգա Զարաֆյանը խոսեցին երկրում տիրող ընդհանուր բնապահպանական խնդիրների մասին:
Ինգա Զարաֆյանի խոսքով՝ քանի որ երկրում ներքաղաքական լարված իրավիճակ էր, ոչ ոք ուշադրություն չէր դարձնում, թե ինչ է կատարվում այլ ոլորտներում:
«Հայաստանի բնական պաշարները սպառվում են և դրանց սպասվում է ոչ լավ ապագա, որովհետև մենք անխնա օգտագործում ենք մեր պաշարները: Մենք շատ լուրջ խնդիր ունենք ջրային պաշարների հետ և պատահական չէ, որ Հայաստանը ներառնվել է այն 33 երկրների ցանկում, որոնք համարվում են սակավաջուր երկրներ: Մենք զբաղեցնում ենք 22-րդ տեղը: Դա նշանակում է, որ մեր ջուրը, որը մենք անխնա օգտագործում ենք, դառնում է շատ լուրջ խնդիր: Ջրային խնդիրը մեծ է հատկապես գյուղատնտեսության ոլորտում: Մենք նաև ունենք լուրջ խնդիր ջրի աղտոտվածության հետ կապված»,-ասաց բնապահպան Ինգա Զարաֆյանը
Նրա պնդմամբ՝ իրենք եղել են Սյունիքում և տեսել են, թե ինչ աղտոտվածություն է տիրում այնտեղ: «Որ ասում են Կարճևան գետ, դա ուղղակի պոչ է, որ հոսում է Ագարակի պղնձամոլիբդենային կոմբինատից: Դա պոչ է, ով չի տեսել գնացեք և ձեր աչքերով կտեսնեք գետի փոխարեն այդ պոչը: Հիմա խնդիր կա ոչ թե միայն գետերի, այլ նաև ջրամբարների, օրինակ Տոլորսի ջրամբարը: Ունենք լուրջ խնդիր Լոռու մարզում՝ և՛ անտառների, և՛ ընդերքի: Հիմնականում սպառված են պաշարները և փակվել է Ալավերդու հանքավայրը: Ունենք խնդիրներ Սևանի հետ կապված»,- նշեց բնապահպանը:
Կարինե Դանիելյանի խոսքով՝ ըստ էկոլոգիական գնահատումների մեզ մոտ վատագույն արդյունքները ստացվել են Երևանում, Լոռու և Սյունիքի մարզերում:
«Ցավոք, մեր վիճակագրությունն այսպիսինն է. «Երևանը և մարզերը»-«Երևանը և քաղաքները» շատ քիչ վիճակագրություն կա և մենք ստիպված ինքնուրույն ենք հանել դա, և եթե մենք դա անում ենք, ապա դարձյալ այս եռյակն է, նույնիսկ՝ առողջական ցուցանիշներով, բայց, երբ քաղաքներն ենք նայում, ապա ստացվում է՝ Վանաձոր, Ալավերդի, Կապան, Երևան: Այն, ինչ մենք հավաքել ենք, վիճակագրական և փորձագիտական տվյալներն են, սակայն Առողջապահության նախարարությունը մեզ հետ համաձայն չէ: Առողջապահության նախարարությունը համամիտ չէ այն մոտեցմանը, որ հանքաարդյունաբերական շրջաններն են ամենավտանգավորը և՛ էկոլոգիայի, և՛ առողջության առումով: Ավելացել են շեղումով ծնունդները և դարձյալ գալիս է նույն եռյակը», - պնդում է Կարինե Դանիելյան:
Մանրամասները՝ տեսանյութերում: