Ի՞նչ եք նախատեսում անել Վանաձորում, որ մի 100 մարդ քիչ գնա Վանաձորից. Էդմոն Մարուքյանը՝ վարչապետին

ԱԺ անկուսակցական պատգամավոր Էդմոն Մարուքյանը Կառավարության նոր ծրագրի մասին հետևյալ հարցերն ուղղեց վարչապետ Տիգրան Սարգսյանին. «Ի՞նչ եք նախատեսում անել Վանաձորում, որ մի 100 մարդ քիչ գնա Վանաձորից, ե՞րբ եք պատրատվում բարեփոխումներ անել և ի՞նչ ձևով:

Ապա Մարուքյանը նշեց, որ վարչապետը հանդիպում է ֆրակցիաների հետ և նրանց հետ քննարկումներ իրականացնում տարբեր հարցերի շուրջ, սակայն խմբակցություններում չընդգրկված պատգամավորների հետ՝ անկուսակցական պատգամավորների հետ, որոնց շարքին է դասվում նաև Մարուքյանը, խորհրդակցություններ չեն լինում:

Վարչապետը պատասխանեց. «Վանաձորում առաջին հերթին պետք է ուշադրության կենտրոնում պահենք աշխատատեղերի ստեղծումը, վանաձորցիների  համար մեկ խնդիրը քիմիական գործարանի խնդիրն է, էներգետիկայի նախարության ուշադրության կենտրոնում է այն և արագորեն  ընթանում  է այն կարգավորելու  հարցը:

Իսկապես, բոլոր ֆրակցիաներին քննարկումների ենք հրավիրել, ներողություն ենք խնդրում, որ ձեզ անտեսել ենք, այսուհետ կհրավիրենք  նաև ձեզ՝ անկախ պատգամավորներին:

Մարուքյանը հետաքրքրվեց նաև Վանաձորի քիմգործարանի պարարտանյութի հետ կապված մանրամասներով, մասնավորապես, երբ գազը թանկանում է, արդյո՞ք  տեղական արտադրության  պարարտանյութը մրցակցային կլինի այլ երկրներից ներմուծված պարարտանյութերի հետ:

Դրան ի պատասխան ՀՀ վարչապետ Տիգրան Սարգսյանը պատասխանեց, որ պարարտանյութի ինքնարժեքի խնդիրների վերաբերյալ Էներգետիկայի նախարությունը կներկայացնի տվյալներ: