Հայաստանը գանձ է, իսկ հայկական ծիրանի մասին գիտի ամբողջ աշխարհը. Ֆեդերիկո Լոմբարդի
Այսօր՝ հունիսի 24-ին, «Էլիտ Պլազա բիզնես կենտրոն»-ում տեղի ունեցավ Սուրբ Աթոռի մամուլի գրասենյակի տնօրեն մոնսինյոր Ֆեդերիկո Լոմբարդիի ճեպազրույցը տեղական և արտասահմանյան լրատվամիջոցների ներկայացուցիչների հետ: Ասուլիսին ներկա էին նաև Հայաստանի արտաքին գործերի նախարարության մամուլի խոսնակ Տիգրան Բալայանը և Մայր Աթոռ Սուրբ Էջմիածնի տեղեկատվական համակարգի տնօրեն Տեր Վահրամ քահանա Մելիքյանը:
Ասուլիսի բանախոսներն իրենց գոհունակությունը հայտնեցին Հայաստանի՝ Պապի ջերմ ընդունելության համար:
Օրն ամփոփելով՝ Ֆեդերիկո Լոմբարդին շեշտը դրեց «Հայոց ցեղասպանություն» բառի արտահայտմանն ու դրանից բխող հետևանքների վրա:
«Նա հստակ ասաց նաև իր խոսքում, որ Հայոց ցեղասպանությունն առաջինն էր 20-րդ դարում, որին հետևեցին մի շարք այլ ցեղասպանություններ, մասնավորապես՝ նացիզմի ու սովետների ոճրագործությունները: Այսինքն՝ Պապն ասաց, որ մյուս երկուսը ֆաշիզմն ու խորհրդային ռեժիմն էր: Պապի նախնական ելույթում «ցեղասպանություն» բառը չկար, բայց վերջինս անակնկալ հայտարարեց, որովհետև այդպես ցանկացավ: Նա այդպիսին է: Պապը կարող է վերջին րոպեին ամբողջությամբ փոխել տեքստը կամ բառեր ավելացնել: Նա մշտապես այդպիսի անակնկալներ է մատուցում և երբեմն էլ շոկի ենթարկում լսարանին»,-ասաց նա:
Լրագրողների այն հարցին, թե ինչու Պապը զրահապատ մեքենան չի գերադասում փոքրիկ հասարակ փոխադրամիջոցից, Սուրբ Աթոռի մամուլի գրասենյակի տնօրենը պատասխանեց. «Պապը միշտ շրջում է հասարակ ավտոմեքենաներով՝ ինչպես սովորական մարդիկ: Նա նախընտրություն չի տալիս զրահապատ մեքենաներին: Բազմաթիվ շքեղ մեքենաների շարասյան վերջում կարող է հայտնվել մի հասարակ մեքենա, որում և գտնվում է Ֆրանցիսկոս պապը»,-ասաց Լոմբարդին և հույս հայտնց, որ Հռոմի պապի այցին կհետևեն նաև մյուսները և կբացահայտեն Հայաստանի հոգևոր հարստությունը: Նրա խոսքով՝ Հայաստանը գանձ է:
Մոնսինյորն անդրադարձավ նաև հայկական ծիրանին, լեգենդար Արարատ սարին և ասաց. «Ամբողջ աշխարհը գիտի հայկական ծիրանի մասին: Մենք ևս առիթ ունեցանք համտեսել այն և շատ հավանեցինք: Ես միշտ հույս ունեմ տեսնել Արարատը: Այն Հայաստանի խորհրդանիշն է»:
Ֆեդերիկո Լոմբարդին ճեպազրույցի վերջում կրկին շեշտեց, որ Պապը անցյալը, պատմությունը հիշում է հանուն խաղաղության և ոչ թե դրանց շուրջ բանավիճելու: Նրա կոչն է՝ «Դասեր քաղել անցյալից»:
Այն հարցին, թե արդյոք Վատիկանի ու Անկարայի հարաբերությունները չեն վատթարանա Պապի հայտարարությունից հետո՝ 1915թ.-ի իրադարձությունները «ցեղասպանություն» որակելուց, Ֆեդերիկո Լոմբարդին ասաց, որ ինքը Թուրքիայի փոխարեն պատասխանել չի կարող և որ իրենք երբևէ չեն ժխտել, որ դա իրականություն է:
Բազմաթիվ այլ ազգերի խնդրանքին՝ այցելել իրենց երկիր, Պապը, նախընտրեց այցելել Հայաստան: