Հռոմի պապի այցը կարևոր է հոգևոր և բարոյական առումով. Վարդան Դևրիկյան (տեսանյութ)

Այսօր՝ hունիսի 22-ին, լրագրողների հետ հանդիպման ժամանակ Գրականության ինստիտուտի տնօրեն Վարդան Դևրիկյանը խոսեց Հռոմի Պապի այցի նշանակության մասին:

Հռոմի պապի այցը Վարդան Դևրիկյանը կարևորում է հոգևոր և բարոյական առումով, որովհետև, ըստ նրա՝ մենք հոգևոր հասկացությունը միշտ փորձում ենք քաղաքականացնել, տարբեր նպատակներ օգտագործել:

«Ես կարծում եմ, որ այս այցն առաջին հերթին երևույթ է հոգևոր և բարոյական առումով և 2-րդ՝ Հռոմի պապն այն հոգևորականներից է, ով առաջնահերթ կարևորություն է տալիս սոցիալական արդարության, չքավորության, հավասարության խնդիրներին և կարելի է ասել, որ սա պակասող հասկացություն է մեր կյանքում, մեր քարոզչության մեջ»,- ասաց Գրականության ինստիտուտի տնօրեն Վարդան Դևրիկյանը:

Վարդան Դևրիկյանի պնդմամբ՝ շատ կարևոր է այն կարգախոսը, որով Հռոմի պապը գալիս է Հայաստան, որպես առաջին քրիստոնյա երկիր:

«Այսինքն՝ նա գալիս է ոչ միայն տեղի կաթոլիկե համայնքի հետ հանդիպման, այլ նաև գալիս է ուխտագնացության»,- հավելեց Վարդան Դևրիկյանը:

Մանրամասները՝ տեսանյութում: