Նրանք հրաժեշտ տվեցին դպրոցական կյանքին, բայց չեն պատրաստվում հրաժեշտ տալ երգարվեստին (լուսանկարներ)

Դպրոցական նստարաններին, կավճոտ գրատախտակներին և հերթապահության ցուցակին հրաժեշտ տվեցին նաև Հայաստանը տարբեր մրցույթներում պատվով ներկայացրած հայտնի պատանի երգիչ-երգչուհիներ: Նրանք արդեն ոտք են դրել կյանքի նոր փուլ, գիտակցելով, որ դպրոցական տարիներն ամենաքաղցր ու անհոգ տարիներն են եղել: Նրանք շարունակելու են հաստատուն քայլերով առաջ շարժվել՝ խոստանալով չմոռանալ հին ընկերներին:

Operativ.am-ի թղթակցի հետ զրույցում հայտնի երգիչ-երգչուհիները խոսեցին իրենց զգացողությունների և հետագա անելիքների մասին, նշելով, որ ինչ մասնագիտություն էլ, որ ընտրեն՝ երգարվեստին կմնան անդավաճան:

Դալիթա- Ավարտեցի Եվրոպական քոլեջի «Կառավարում և մենեջմենթ» կուրսը: Զգացողություններս տարբեր են՝ թե՛ ուրախ, թե՛ տխուր: Ուրախ եմ, քանի որ կյանքի նոր փուլ եմ քայլ կատարում, և տխուր, քանի որ հաճախ չեմ տեսնելու իմ համակուրսեցիներին: Յուրաքանչյուրս տարբեր ուղիներ ենք ընտրել: Շատ կկարոտեմ նրանց և իմ սիրելի քոլեջը: Երաժշտական գործունեությունս շարունակելու եմ, իսկ ապագա մասնագիտությունս կախված է քննություններին հավաքածս միավորներից: Հուսամ՝ ամեն բան լավ կընթանա և ամեն բան իմ սրտով կլինի:

Դավիթ Վարդանյան-Ավարտեցի Բելինսկու անվան թիվ 38 դպրոցը: Զգացողութուններս անբացատրելի են: Տխրությունն ու կյանքի նոր փուլի ակնկալիքներն այս պահին խառնվել են ու չեմ ուզում բաժանվել, բայց...Հետագա անելիքներիս հետ կապված կասեմ, որ նոր մասնագիտության մասին մտածում եմ, սակայն, ինչ էլ անեմ՝ բեմը, երաժշտությունն ու երգն իմ կյանքն են: Ես առանց այդ ամենի չեմ կարող: 

Դավիթ Պարոնիկյան -Ավարտեցի Համբարձում Գալստյանի անվան թիվ 83 դպրոցը: Շատ տխուր եմ, որ ավարտում եմ դպրոցը, բայց չեմ կորցնի կապը համադասարանցիներիս հետ: Նոր շունչ  եմ զգում,  նոր ճանապարհ եմ տեսնում: Որոշել եմ երաժշտությամբ շարունակել կյանքս. մտադիր եմ ընդունվել Կոնսերվատորիա:

Արշավիր  Գրիգորյան- Կարծում եմ՝ միակը չեմ, որ տխրում է այս  քացր տարիներն ավարտելու հետ կապված: Չնայած բոլորն ասում են, որ ավելի բարդ փուլ է սկսվելու, բայց ես կարծում եմ, որ ամեն բան շատ ուրախ ու թեթև է լինելու: Երաժշտությունն իմ կյանքի մասն է, և ես մտադիր եմ շարունակել ինձ համար ապրելակերպի այս տեսակը: 

Մանե Առաքելյան- Ավարտեցի Երևանի Նաիրի Զարյանի անվան թիվ 130 դպրոցը, ավելի ճիշտ՝ այս պահին հանձնում եմ ավարտական քննությունները: Զգացողություններս տարբեր են. կա իհարկե տխրություն՝ կապված նրա հետ, որ այլևս իմ հարազատ դասարանի հետ չեմ սովորելու, չեմ տեսնելու իմ ամենասիրելի ուսուցիչներին: Կա նաև անհանգստություն, որովհետև դեռ չգիտեմ, թե ինչ դասարանում եմ սովորելու, ովքեր են դառնալու իմ նոր ընկերները: Կա նաև անորոշություն, որովհետև այդպես էլ չեմ կարողանում կողմնորոշվել՝ գնալ քոլեջ, թե ավագ դպրոց… խորհուրդներն ու կարծիքները շատ տարբեր ու բազմազան են:

Ապագա մասնագիտությունս, անկախ երաժշտական պրոֆեսիոնալ կրթությունից, որը ստանում եմ Սպենդիարյանի անվան երաժշտական դպրոցում, կապված է լինելու լեզուների հետ՝ անգլերեն-իսպաներեն:

Հետագա ծրագրերս կապված են նաև արտերկրի, մասնավորապես ԱՄՆ-ի՝ ջազային ուղղվածություն ունեցող երաժշտական հաստատությունների հետ:
Երազանքներս ու նպատակներս շատ են…